Tiniyak ni Pangulong Ferdinand R. Marcos Jr. ang matatag na paninindigan ng Pilipinas sa pagpapatibay ng Rule of Law at sa pagpapaigting ng kooperasyon ng mga bansang kasapi ng Association of Southeast Asian Nations (ASEAN) sa pagbubukas ng 13th ASEAN Law Ministers Meeting na ginanap sa Bonifacio Global City, Taguig City.
Sa kanyang talumpati, binigyang-diin ng Pangulo na ang pagkakaisa ng mga bansang ASEAN ay dapat nakaugat sa katarungan at kaunlaran, mga haliging patuloy na nagsisilbing gabay ng rehiyon sa loob ng halos apat na dekada mula nang unang ganapin ang pagpupulong ng mga ASEAN Law Ministers noong 1986 sa Bali, Indonesia.
Isa sa mga pangunahing tampok ng pagpupulong ang nalalapit na pagpirma sa ASEAN Extradition Treaty (AET) — isang kasunduang magpapatibay sa pagtutulungan ng mga bansa sa paghahatid ng hustisya at sa pagtiyak na walang kriminal ang makatatakas sa batas sa pamamagitan lamang ng pagtawid ng hangganan o border.
“The AET reflects our collective resolve – that individuals with criminal charges will not escape justice by crossing borders in ASEAN (Ang AET ay malinaw na pahayag ng ating kolektibong paninindigan — na hindi makakatakas sa hustisya ang mga taong may kasong kriminal sa loob ng ASEAN),” ani Pangulong Marcos.
“With this landmark treaty, we send a clear message to the world that we are united and that our legal foundation is stronger than ever (Sa kasunduang ito, ipinapakita natin sa buong mundo na ang ASEAN ay nagkakaisa at may mas matatag na pundasyong legal).”
Dagdag pa ng Pangulo, mahalagang harapin ng ASEAN hindi lamang ang mga tradisyunal na krimen kundi pati na rin ang mga bagong hamon ng makabagong panahon, kabilang ang cybercrimes at ang mga etikal at legal na usapin ng Artificial Intelligence (AI).
Giit ng Pangulo, kailangang maging makatarungan, matatag, at ligtas ang mga batas na namamahala sa digital space upang mapanatiling makatao at inklusibo ang pag-unlad ng rehiyon.
“We make these efforts to promote the idea that the law continues to be the great equalizer of our time (Dapat nating tiyakin na ang batas ay patuloy na nagsisilbing dakilang tagapagpantay sa ating panahon),” aniya.
“This is especially true now as we have seen how corruption, inefficiency, and impunity can erode the moral bases of our societies
(Ito ay totoo sa kasalukuyang panahon na nakikita natin kung paano sinisira ng korupsyon, kawalan ng kakayahan, at kawalan ng parusa ang moral na pundasyon ng ating mga lipunan).”
Pinagtibay din ni Pangulong Marcos ang pangako ng Pilipinas na makipagtulungan sa lahat ng kasaping bansa para sa isang mas matatag, mas matibay, at mas inklusibong ASEAN, kabilang ang pagbibigay-suporta sa Timor-Leste habang ito ay naghahanda na maging ganap na kasapi ng mga legal na katawan ng ASEAN.
Sa pagtatapos ng kanyang talumpati, nanawagan ang Pangulo sa lahat ng mga kasapi na ipagpatuloy ang pagkakaisa at dedikasyon upang mapanatiling buhay ang pangako ng ASEAN sa katarungan, pagkakapantay-pantay, at kapayapaan.
“Together, let us honor that promise and work towards it, united in the belief that justice and fairness know no borders in ASEAN (Sama-sama nating tuparin ang pangakong ito — na sa ASEAN, ang katarungan at pagkakapantay-pantay ay walang hangganan),” pagtatapos ni Pangulong Marcos. | PND
