“Alam ko, bago mag-Pasko, makukulong na sila. Wala silang Merry Christmas.”
Sinabi ni Pangulong Ferdinand R. Marcos Jr. nitong Huwebes na karamihan sa mga kinasuhan kaugnay ng katiwalian sa mga proyektong pang-flood control ay makukulong bago sumapit ang Pasko, bilang bahagi ng kanyang administrasyon sa pagsusulong ng pananagutan at hustisya.
Sa isang press conference sa Malacañang, iniulat ng Pangulo ang mga nagawa mula pa noong Ika-apat na State of the Nation Address (SONA) noong Hulyo 28, na nagbunga ng pagsasampa ng mga kasong kriminal laban sa mga umano’y nagwaldas ng pondo ng bayan sa mga peke at mababang kalidad na proyekto, pagpapatupad ng asset freeze orders, at pagsasagawa ng mga reporma sa mga proyekto ng pampublikong imprastraktura.
“Alam ko, bago mag-Pasko, marami dito sa napangalanan… matatapos na ‘yung kaso nila, buo na ‘yung kaso. Makukulong na sila. Wala silang Merry Christmas,” ayon sa Pangulo.
Ayon kay Pangulong Marcos, nakatutok ang mga aksyon ng administrasyon sa tatlong layunin.
Una, panagutin ang mga sangkot sa katiwalian; pangalawa bawiin ang mga ninakaw na pondo ng bayan; at pangatlo, magtatag ng mga repormang pipigil sa ganitong mga gawain.
“Kaya ‘yang mga taong ‘yan na kasabwat diyan, ito mga walanghiyang nagnanakaw ng pera ng bayan: tapos na ang maliligaya ninyong araw. Hahabulin na namin kayo,” pahayag ni Pangulong Marcos.
Binanggit din ng Pangulo ang kahalagahan ng matibay na ebidensya sa pagsasampa ng kaso, upang maiwasan ang pagkakabasura ng mga ito dahil sa teknikalidad sa batas.
“Alam ninyo kinakatakutan namin na ‘yung mga alam natin na talagang kasabwat dito sa kawalang hiyaang ito ay makakalusot sa kaso because of a legal technicality, dahil nagkamali tayo sa pagbuo Ng ebidensya, dahil hindi maganda ang pagprisinta ng kaso o nakalimutan natin ang pagpirma sa Isang dokumento.” ayon Kay Pangulong Marcos
” Kaya tinitiyak namin na pagka kami ay sumampa ng kaso, yang kasong yan hanggang dulo ay matibay ang kaso at kung sino man ang mga guilty, ay sila naman talaga ay mananagot. at kung kailangan at kung huhusgahan sila ng korte ay makukulong sila,”
Matapos banggitin ng Pangulo sa SONA ang katiwalian sa flood control projects, nagsagawa ang Malacañang ng pambansang audit at imbestigasyon, at binuksan ang “Sumbong sa Pangulo” website para sa mga ulat ng publiko.
Nagsampa na ng mga kasong kriminal laban sa mga kasalukuyan at dating opisyal ng Department of Public Works and Highways (DPWH) at Commission on Audit (COA), gayundin sa ilang mambabatas at kontratista.
Ilang araw bago likhain ni Pangulong Marcos ang Independent Commission for Infrastructure (ICI) noong Setyembre 11, nagsampa na ang DPWH at COA ng unang hanay ng kaso sa Ombudsman laban sa tatlong kontratista, kabilang dito ang St. Timothy Construction, Wawao Builders at SYMS Construction Trading.
Inilagay din ng DPWH sa blacklist ang siyam (9) na kumpanyang konektado kina Pacifico at Sarah Discaya, kabilang ang St. Timothy Construction.
Noong Setyembre din, nagsampa ng kasong graft ang DPWH laban sa 20 opisyal ng Bulacan 1st District Engineering Office (DEO) at anim (6) na contractor mula sa St. Timothy Construction, Wawao Builders, SYMS Construction Trading, IM Construction Corp., at Topnotch Catalyst Builders/One Frame Construction.
Samantala, nasabi ring buwan, nasamsam ng Bureau of Customs (BOC) ang 13 luxury vehicles ng mag-asawang Discaya at itinakda ang public auction sa Nobyembre 20.
Ang Department of Trade and Industry (DTI) ay kumuha ng direktang kontrol sa contractor licensing upang maiwasan ang conflict of interest, habang ang Anti-Money Laundering Council (AMLC) ay naglabas ng pitong freeze orders na may kabuuang halaga na PhP6.3 bilyon — kabilang ang mga bank account, ari-arian, sasakyan, insurance, at e-wallet accounts — isa sa pinakamalaking asset seizures sa kasaysayan ng bansa.
Noong Setyembre 29, inirekomenda ng ICI sa Ombudsman ang unang batch ng mga kasong kriminal at administratibo laban sa 37 mambabatas, dating opisyal ng DPWH, at mga kontraktor, kaugnay ng graft, korapsyon, malversation, falsification, at plunder.
Noong Oktubre, sinampahan ng mga kasong malversation at graft and corruption ang 13 opisyal at kawani ng La Union 2nd DEO, walong opisyal at kawani ng Davao Occidental DEO, at apat na kontratista mula sa Silverwolves Construction Corp. at St. Timothy Construction Corp.
Samantala sa nasabi ring buwan, nagsampa naman ang Philippine Competition Commission (PCC) ng 12 kaso ng bid-rigging laban sa St. Timothy Construction Corp.
Noong Nobyembre, nagsampa ang Bureau of Internal Revenue (BIR) ng mga kaso ng pag-iwas sa buwis na nagkakahalaga ng PhP8.86 bilyon laban sa 89 na kontratista at siyam na opisyal mula sa DPWH at COA. | PND
