SEC. ROQUE: Magandang umaga, Manong Mike. At magandang umaga, Pilipinas.

ENRIQUEZ: Puwede ninyo bang sabihin sa mga nakikinig at nanunood sa atin ngayong umaga kung ano po ang lalamanin ng talumpati ni Pangulong Duterte mamayang hapon, Secretary?

SEC. ROQUE: Hindi po pupuwedeng detalye dahil baka ako naman ang magkaroon ng—

ENRIQUEZ: Opo, opo.

SEC. ROQUE: [Laughs] Ako na ang kinakailangang mag-state of the nation at huli ko ng araw sa pagtatrabaho ‘no.

ENRIQUEZ: Hindi po, iyong mga paksang tatalakayin niya mamaya halimbawa. Iyong mga ganoon ba, Secretary.

SEC. ROQUE: Opo. Basically po, isa-summarize niya iyong mga naging accomplishments ng gobyerno sa nakalipas na limang taon at kung ano pa iyong kaniyang roadmap para doon sa huling taon na natitira pa ‘no. Inaasahan po natin na iisa-isahin ni Presidente ang kaniyang mga nagawa na, nandiyan na po iyong pag-i-implement po ng Universal Health Care – iyong libreng gamot at libreng pagamot na mayroon na po tayong mga 109 milyong mga Pilipino ang nakikinabang ‘no.

Nandiyan din po iyong libreng irigasyon kung saan iyong mga maliliit na magsasaka na halos isang milyon ang kanilang bilang ay nagkaroon na po ng libreng irigasyon. Iyong libreng tuition sa state universities at colleges. At siyempre po iyong mga nagawa natin sa COVID. Nandiyan po iyong halos 17 million na ating nabakunahan at iyong halos 30 million na naangkat na natin na mga bakuna at inaasahan pa natin nga iyong suma tutal ay hindi bababa sa 170 million na mga bakuna na ating aangkatin na darating po iyan bago po mag-Disyembre po ‘no.

At nandiyan po iyong napakadaming mga isolation facilities na nagawa na ng ating gobyerno. Dati-rati po ay iisa lang ang ating RT-PCR testing, eh ngayon po ay mahigit 235 na po ang mga testing facilities natin at pangatlo po tayo ngayon sa ASEAN sa dami po ng testing na ginawa.

Pero siyempre po nandiyan po iyong tinatawag nating “The golden renaissance of Philippine infrastructure”, iyong Build, Build, Build ‘no. At napakadami pong kalyeng naipagawa, sa katunayan po ay hindi bababa sa 30,000 kilometers of roads ang nakumpleto natin. Napakadaming mga tulay, nandiyan na iyong Kalayaan Bridge, nandiyan na iyong connector at nandiyan na po iyong bagong CLLEX ‘no – iyong highway na nagku-connect sa Tarlac papunta po ng Cabanatuan.

So, siyempre po nandiyan din po iyong matagumpay na giyera laban sa droga kung saan mahigit singkuwenta porsiyento po ng mga barangay natin ay nadeklarang drug-free na, at inaasahan natin na sa susunod na taon ay tututukan pa lalo ng Presidente iyong 50% more na mga barangay na dapat maging drug-free.

ENRIQUEZ: Opo. Secretary, lahat po ng SONA ng lahat ng Presidente, kabilang po sa nilalaman niyan ay kung ano ang tinatawag na legislative agenda o kung ano iyong mga panukalang batas na hihingin niya doon sa dalawang kapulungan ng Kongreso – iyong Senado at saka po iyong Kamara de Representantes – na pagbigyan ng prayoridad, unahin. Anu-ano po iyan, kung mayroon man, mamayang hapon sa talumpati ni Presidente, Secretary?

SEC. ROQUE: Well, nangunguna na po diyan iyong magiging dahilan para tayo po ay makapag-manufacture ng sarili nating bakuna dito sa Pilipinas. Mayroon din po tayong mga panukalang batas na mag-i-establish po ng center for disease control nang sa ganoon ay mas maging institutionalize iyong ating response sa mga pandemya, kung mayroon pang ibang mga pandemyang darating ‘no.

At bukod po diyan, mayroon din po tayo, iyong pag-further liberalize po natin ng ekonomiya at saka iyong siguro po ilang panukalang batas tungkol po sa West Philippine Sea.

ENRIQUEZ: Okay. Secretary, wala pa yata kayong nababanggit tungkol sa laban, paglaban sa katiwalian. Mayroon bang usapang ganiyan mamayang hapon, Secretary?

SEC. ROQUE: Well, siyempre po iyan po ay cornerstone din ng administrasyon ng ating Pangulo, at bagama’t wala pa po tayong opisyal na barometer by which we can measure kung gaano katagumpay po iyan, ito lang po ang kauna-unahang Presidente na talaga naman pong sumibak nang sangkatutak na mga korap na tao sa gobyerno, maski iyong mga pinakamalalapit sa kaniya noong panahon ng eleksyon pa. In fact, maaga pa lang sa kaniyang administrasyon, considered pinakamalalapit sa kanila, sila iyong nasibak ‘no.

At sa kaniyang regular Talk to the People, patuloy niyang binabasa ang mga pangalan ng mga nasibak. Ito po ay nagpapadala ng mensahe na walang lugar po sa administrasyon na ito ang korapsyon. So bagama’t hindi tuluyang mawawala ang korapsyon ay pinakita po ng Presidente na hindi po kabahagi ng polisiya ng administrasyon ang korapsyon.

ENRIQUEZ: Babanggitin niya rin ba iyong tungkol sa endo, doon sa mga mambabatas mamaya, Secretary, na inaabangan iyan ng mga manggagawa eh?

SEC. ROQUE: Opo. Talaga po iyan ay isang sa mga pangako ng Presidente. Bagama’t iyong bersyon na naipasa ng Kongreso ay vineto [vetoed] rin niya dahil may mga probisyon doon na inconsistent sa tingin ng Presidente sa ating Saligang Batas. Pero hindi po ibig sabihin nito na nabalewala na po ang endo ‘no. Endo po ay kasama pa rin sa mga administration bills at inaasahan po na sana natin na ma-rectify iyong ilang mga probisyon na naging dahilan kung bakit vineto ng Presidente iyong napasang endo bill ng Kongreso.

ENRIQUEZ: May babanggitin po si Presidente mamayang hapon tungkol sa eleksyon 2022, Secretary?

SEC. ROQUE: Well, siguro po iyong kaniyang panawagan na sinabi na niya sa kaniyang Talk to the People na kinakailangan ang Comelec ay gumawa ng mga hakbang para magkaroon po ng pagbabago sa pamamaraan ng ating conduct ng eleksyon dahil nga po dito sa pandemyang ito na kinakailangang iwasan iyong mga super spreader events.

ENRIQUEZ: Sige po. Kayo naman, Secretary, iyong puso ninyo kumusta? Kayo ba ho ay may pahintulot na ng mga doktor ninyo na sumabak sa kampaniya sa eleksyon 2022?

SEC. ROQUE: Well, ako po ay magpapa-schedule ng thorough physical check-up bago po dumating ang buwan ng Setyembre at para nga po malaman kung ano talaga ang estado natin. At bagama’t ito pong SONA na ito ay ito na rin ang kahuli-hulihang SONA ko bilang tagapagsalit, so hindi lang po si Presidente ang magpapaalam, ako rin po ay nagpapasalamat sa GMA, sa tulong na ginawa ninyo sa nakalipas na limang taon. At inaasahan ko po ang patuloy na pagtulungan natin at pagdadala ng mga balita at mga impormasyon na nakakaapekto sa pang-araw-araw na buhay ng ating mga mamamayan.

So iyon lang po ‘no. Nagagalak po kami sa pagkakataon na naibigay sa atin para maging instrumento na isulong iyong freedom of information ng taumbayan, at inaasahan po natin na sa natitira pang isang taon ay patuloy po ang ating partnership ng GMA.

ENRIQUEZ: Kung sa Setyembre ho, bago mag-Setyembre sa check-up ninyo sabihin ng mga doktor na okay ang puso ninyo, okay ang katawan ninyo, okay ang kalusugan ninyo, eh di tuloy na iyong pagkandidato ninyo sa pagka-senador?

SEC. ROQUE: Well, titingnan po muna natin iyan. Ayaw ko na po munang umasa ‘no dahil noong minsan, tayo po ay umaasa eh hindi naman pupuwede dahil sa ating medical condition ‘no. So pinagdadasal po natin iyan at titingnan po natin kung ano ang sasabihin ng mga doktor.

ENRIQUEZ: Sige po. Secretary, nagpapasalamat po kami sa oras na ibinigay ninyo sa aming himpilan ngayong umaga at sa pagsagot ninyo sa mga tanong namin. Kung kakailanganin, patuloy kaming makikipag-ugnayan sa inyo lalung-lalo na pagkatapos naman, o iyong tawagan sa wikang ingles, iyong post-SONA, iyong pagkatapos po ng State-of-the-Nation Address ni Pangulong Duterte mamayang hapon.

SEC. ROQUE: May schedule na po ako. Lalakad ako sa inyong OB van na katabi yata ng presinto diyan sa Kongreso at iyan po ay matapos ang State-of-the-Nation Address. Kaya sabi ko po kay Tex ay maghanda siya ng pagkain dahil hindi ako makakakain doon sa SONA. [Laughs]

ENRIQUEZ: Sige po, Secretary. Salamat po sa oras.

SEC. ROQUE: Maraming salamat po at magandang umaga po.

###

—