Nagsilbing panauhing pandangal si Pangulong Ferdinand R. Marcos Jr. ngayong araw, March 9, sa pagbubukas ng 2023 National Convention ng Philippine Councilor’s League (PCL) sa World Trade Center sa Pasay City. Sa kaniyang mensahe, naniniwala si PBBM na mahalaga ang suporta ng lokal na pamahalaan sa ilang layunin at hangarin ng kaniyang administrasyon tulad ng pagsasabatas ng E-Governance Act, pag-amiyenda sa Build-Operate-Transfer Law, at pagpapasa ng National Land Use Act, at iba pa. Mahalaga rin aniya ang papel ng LGUs sa pagpapaabot ng tulong sa mga komunidad. Bilang bahagi ng opening ceremony, pinangunahan din ng Pangulo ang panunumpa ng mga bagong halal na PCL national officers at island officers.

Nakiisa si Pangulong Ferdinand R. Marcos Jr. at ang mga tanggapan ng pamahalaan sa ginanap na 1st Quarter Nationwide Simultaneous Earthquake Drill (NSED) ngNational Disaster Risk Reduction and Management Council (NDRRMC) ngayong Huwebes ng hapon. Ang NSED ay taunang aktibidad ng pamahalaan na may layuning mapabuti ang kahandaan ng mga Pilipino sa mga posibleng lindol na maaaring mangyari sa bansa.

Nakisa ang delegasyon ng Pilipinas sa pagdiriwang ng International Women's Day sa United Nations (UN) headquarters sa New York City. Pinanguhan ni Ambassador Antonio Lagdameo ang delegasyon ng Pilipinas. Nilahukan din ito ng mga lider at tagapagtaguyod mula sa iba't ibang panig ng mundo, kung saan tinalakay ang mga isyu na nakaaapekto sa mga kababaihan at mga batang babae, lalo na sa larangang digital gender equality.

Ibinahagi ni National Economic and Development Authority Secretary Arsenio Balisacan sa press briefing ngayong araw na inorganisa ng Presidential Communications Office ang pag-apruba ni Pangulong Ferdinand R. Marcos Jr. sa dalawang mahalagaang inisyatibo ng pamahalaan sa infrastructure sector ng bansa. Ito ay ang pagpapalawig ng listahan ng 194 na flagship infrastructure projects sa ilalim ng Build Better More program at ang pagbabago sa 2013 NEDA Joint Venture guidelines para sa mas madaling pagpoproseso ng mga kasunduan sa ilalim ng Public-Private-Partnership.

Nagkaroon ng National Economic and Development Authority (NEDA) Board meeting ngayong Huwebes para sa pagtalakay tungkol sa tentative na listahan ng mga Infrastructure Flagship Projects sa ilalim ng programang "Build, Better, More" ng pamahalaan. Ayon kay NEDA Secretary Arsenio Balisacan, nasa 194 na proyekto na aabot sa halagang P9-trillion ang ang nasa kanilang listahan. Ilan sa mga big-ticket projects ay ang Panay Railway Project, Mindanao Railway Project III, North Long Haul Railway, San Mateo Railway, UP-PGH Diliman Project, NAIA or Ninoy Aquino International Airport Rehabilitation Project, Ilocos Sur Transbasin Project, at Metro Cebu Expressway. Tinalakay din sa pagpupulong ang pag-amyenda sa 2013 NEDA Joint Venture (JV) Guidelines. Inaasahang mas mapapadali nito ang proseso ng Public-Private-Partnership at masiguro ang naaayon sa batasat pinansiyal na kapasidad ang mga proyekto.

Personal na nagpaabot ng kaniyang pakikiramay si Pangulong Ferdinand R. Marcos Jr. ngayong araw sa naulilang mga kaanak at kaibigan ng yumaong Negros Oriental Governor Roel Degamo. Sa isang media interview, ibinahagi ng Pangulo na sisiguruhin ng pamahalaan ang pagresolba sa kaso maging ang pagsagot sa pag-aaral ng mga anak ng mga nasawi sa trahedya at ang pagpapa-ospital ng mga sugatan.

Nagbigay si Pangulong Ferdinand R. Marcos Jr. ng direktiba sa Department of Environment and Natural Resources (DENR) na magpadala ng agarang tulong sa clean-up ng oil spill na dulot ng paglubog ng motor tanker (MT) Princess Empress sa Oriental Mindoro. Tinitingnan ng DENR ang paghingi ng suporta mula sa mga kalahok ng Balikatan, isang taunang aktibidad ng Armed Forces of the Philippines at United States Armed Forces, habang nagpaabot din ng intensyon ang Japan at South Korea sa pagkontrol ng pinsala. Nakikipagtulungan din ang DENR sa mga lokal na gobyerno, sa may-ari ng bapor, at Department of Social Welfare and Development upang makakalap ng dagdag pondo para sa cash-for-work program para sa mga residente.

Inatasan ni Pangulong Ferdinand R. Marcos Jr. ang Philippine Health Insurance Corporation (PhilHealth) na palawigin ang mga benepisyong ibinibigay nito sa mga Pilipino.Sa isang pulong, inihain ng PhilHealth ang mga short-term nitong plano, kabilang ang pagbibigay ng higit na tulong sa mga nagpapa-dialysis, bagong mga benefit package, pati na rin ang paggawa ng mobile app at text message service. Kasama sa medium-term, na mag-uumpisa sa 2024, ang pagbigay ng amnestiya para sa mga hindi nabayarang serbisyo, pag-amyenda sa Universal Healthcare Law, at pagpataw ng multa sa mga nagkamaling mga doktor at ospital. Balak din ng Philhealth na gawing mas makabago ang paglilingkod nito at magtayo ng sarili nitong gusali at pasilidad.

Kasalukuyang nasa Estados Unidos ngayon si Presidential Communications Office Undersecretary Cherbett Maralit bilang bahagi ng delegasyon ng Pilipinas sa ika-67 na session ng Commission on the Status of Women (CSW67) sa United Nations (UN) Headquarters sa New York City. Kasama ni Usec. Maralit sina Department of Information and Communications Technology - DICT Usec. Anna Mae Lamentillo, Commission on Human Rights of the Philippines Commissioner Faydah Dumarpa, Bb. Anette Baleda ng Philippine Commission on Women, at Bb. Roseny Fangco ng Philippine Permanent Mission to the UN.