VELASQUEZ: Nasa linya ng telepono po si Secretary Harry Roque. Secretary Harry, good morning. Si Danny at si Tony po ito.

BUENAFE: Good morning, Sir Harry.

SEC. ROQUE: Oo. Magandang umaga, Tony. And good morning, Mate Danny. [laughs]

BUENAFE: How are you, Sir Harry? Are you okay now because mayroon kang COVID ‘di ba I heard?

SEC. ROQUE: Well, alam ninyo po, asymptomatic naman po ako kaya lang po nabuburo na dito sa isolation ‘no. Kaya noong sinabi noong staff ninyo kung pupuwede mag-Zoom, sabi ko, hay naku, ang mga naka-isolation hindi nag-aayos kaya huwag ninyo na akong tingnan kung ano itsura ko ngayon. [laughs]

VELASQUEZ: Oo, tama. ‘Di bale na iyong hindi nag-aayos basta naliligo. [laughs]

SEC. ROQUE: Oo, naliligo naman po. [laughs]

BUENAFE: Oo. Pero ano ho ba ang sitwasyon, are you on the way to recovery na ho? Okay na?

SEC. ROQUE: Well, akala ko bukas pupuwede na ako mag-press briefing sa Malacañang muli ‘no kasi it is my test day, eh asymptomatic naman ako. Eh sinabihan naman ako ni Secretary Duque, “Hindi. Kapag ikaw asymptomatic, you have to finish the 14.” The 10 days is kapag mayroon kang symptoms; so puwede ka nang lumabas from the 10th day after mawala ang sintomas. So hindi na naman ako makakalabas pala ‘no hanggang Lunes pa talaga iyong aking press briefing sa Malacañang.

VELASQUEZ: Yeah. Anyway, with technology now, you can do the briefing kahit nasa isolation and you can still monitor siyempre what’s happening din naman ano sa Palasyo. Pero ito nga, Sec. Harry, and sana nga po we can settle this once and for all ano kung ano nga po ang kahulugan noong naging pahayag ni Pangulong Duterte noong Lunes ng gabi. And maybe para lang mayroon tayong clearer idea kung ano nga ba iyong tinutukoy natin na pahayag ng Pangulo, sana kung ready na ulit iyong studio and with your permission ‘no, Secretary Harry, papatugtugin natin ulit iyong mismong portion na iyon ng pahayag ng Pangulo kung saan kinukuwestiyon niya itong indemnification agreement or indemnification law.

SEC. ROQUE: Okay po.

VELASQUEZ: Sige po. Kung ready na po ang studio, patugtugin po natin ulit iyong portion na iyon na pahayag ni Pangulong Duterte.

[AUDIO CLIP]

VELASQUEZ: Okay. Iyon po ah, pinatugtog po namin muli, mga kapamilya, iyong mismong pahayag ng Pangulo para narinig ninyo po iyong mismong mga kataga na kaniya pong ginamit ano at saka narinig na rin po siyempre ni Secretary Harry Roque iyon.

So, Secretary Harry, ito po bang mga komento ng Pangulo, mayroon po ba siyang pinupuna doon mismo sa batas na kaniyang nilagdaan or hiwalay pa ho ito doon sa batas na pinirmahan niya noong nakaraang buwan?

SEC. ROQUE: Malinaw po ang sinasabi ni Presidente, konteksto, kasi alam mo iyan nandoon ako by Zoom ‘no, tapos na iyong aming komperensiya, tapos na rin iyong recording kaya lang biglang lumabas iyong issue na iyong mga private sector ay nais bumili ng bakuna ‘no. So ang sabi naman namin ay talaga namang makakabili sila pero sa pamamagitan lang ng tripartite agreement kasi nga wala pang general use … commercial use authorization iyong mga bakuna ‘no. So—at ang dahilan kaya kinakailangan lumagda ang gobyerno sa tripartite agreement ay dahil nga doon sa EUA ‘pag mayroong pananagutan, ang sasagot ay gobyerno.

Now, ang konteksto ng sinasabi ni Presidente, unang-una, kung magpipilit ang private sector na sila ang bibili na hindi kasama ang gobyerno, hindi pupuwede na kung hindi isasama ang gobyerno, gobyerno pa rin ang mananagot. Malinaw sa kaniyang pananalita eh, hindi pupuwede iyon na gusto ninyo na bumili na walang pirma ang gobyerno and yet gusto ninyo kapag may side effects mananagot pa rin ang gobyerno.

So malinaw na malinaw po iyong sinabi ni Presidente ‘no, hindi pupuwede na bibili ang private sector sa labas ng tripartite agreement habang wala pang general use. Kung talagang gusto nilang diretso na walang gobyerno, eh kung pupuwede bayaan mo sila pero ‘pag mayroong side effect iyan, mananagot iyong private, hindi ang gobyerno. Kasi nga sa batas na iyon, gobyerno ang mananagot ‘no.

Tapos pangalawa pa, isa pang konteksto niyan is iyong hindi pupuwede—kasi may mga ilang manufacturers na nagsasabi na gusto nila ay absolutely wala silang pananagutan. Kaya din ang sabi ni Presidente, hindi rin pupuwede iyon ‘no doon sa mga vaccine manufacturers, maski hindi na tayo makakuha ng bakuna sa kanila. Pero sa batas kasi natin, walang pananagutan ang manufacturer basta walang willful neglect at saka iyong gross negligence ‘no.

Pero maniwala ka’t hindi, may ilang mga vaccine manufacturers na gusto iyon ‘no na talagang absolutely wala silang pananagutan, hindi rin pupuwede iyon. So sa akin naman, malinaw ‘no na iyong konteksto ng sinabi ni Presidente mismo iyong lengguwaheng ginamit niya eh hindi pupuwede na diretso kayong bibili, hindi kasama ang gobyerno and yet gusto ninyong managot ang gobyerno. [laughs]

Kung mananagot ang gobyerno, eh kasama tayo sa tripartite agreement at saka iyong isang—kasi dalawa iyang konteksto ng indemnity na ‘yan eh dahil nagsalita si Secretary Dominguez noong pagpupulong na iyon. Iyong sinabi nga ni Secretary Dominguez eh ang problema naman kahit bumili iyong mga private sector, nagri-require iyong manufacturer ng indemnity. So iyon nga iyong ina-address ni Presidente, kung ang gobyerno ang mananagot, kailangan kabahagi sa kasunduan ang gobyerno.

VELASQUEZ: Kasi sa ngayon, hindi nga puwedeng bumili ang private sector kung hindi dadaan sa gobyerno dahil EUA pa lang naman ang ginagamit ng mga pharma companies para makapag-distribute ng vaccines. So, ang sinasabi ng Pangulo, kung kunwari in the future ba na mayroon nang—

BUENAFE: Makarekta ang mga private sector to buy the vaccine parang ganoon yata.

VELASQUEZ: Oo, kumbaga he is referring to a future point na kapag puwede nang rumekta iyong private companies na bumili ng bakuna, dapat hindi na obligasyon ng gobyerno na sagutin iyong adverse effect nito, tama ba?

SEC. ROQUE: Opo. Sinasabi ng Presidente kung gusto ninyong managot ang gobyerno, kabahagi pa rin sa kasunduan ang gobyerno.

BUENAFE: Ng tripartite?

SEC. ROQUE: Kung talagang ayaw ninyo na kasama ang gobyerno, kung pupuwede, although imposible po dahil ito nga iyong sinabi ni Secretary Dominguez na nag-react si Presidente, eh iyong ilan sa kanila gusto nilang pumasok as manufacturers, ang manufacturers naman ayaw pumasok kung walang indemnity ang gobyerno. So, ang sabi ni Presidente, kung magiging posible na sila ay diretsong papasok na walang gobyerno eh sila ang managot sa side effect. Bakit mananagot ang gobyerno?

VELASQUEZ: Secretary Harry—sorry, Pareng Dan, para lang malinaw and then I will pass it to you. So, ang ibig sabihin noon, Secretary Harry, kaya biglang ni-raise ni Pangulong Duterte itong point na ito about the indemnification dahil kinukuwestiyon ng ilang sektor kung bakit ayaw nang payagan iyong mga companies mismo na rektang bumili sa mga manufacturers. Kasi iyan ang nagiging parang comment ng iba, bakit hindi na lang ninyo payagan iyong private sectors na bumili kaagad ng bakuna para mabakunahan na nila iyong employees nila. So, iyon ba ang nagiging point na nagri-react si Pangulong Duterte?

SEC. ROQUE: Tama po, kasi may ibang mga private sector na akala nila ay makakabili sila na hindi sa pamamagitan din ng tripartite agreement. Sa totoo lang po, walang manufacturer na magbebenta nga na hindi kasama ang gobyerno sa kasunduan kasi nga po iyong isyu ng sino ang magbabayad kung mayroong side effect. Pero kung mayroon talagang gusto na diretso sila na walang gobyerno, iyon iyong sabi ng Presidente, bahala kayo, kung talagang hindi ninyo kami isasama sa kasunduan ninyo at kayo ay makakapasok sa ganiyang kasunduan na walang gobyerno eh kayo ang bahala sa mga side effect.

BUENAFE: Punta naman tayo sa punto ng mga vaccine manufacturer. Do they require na kailangan mamagitan ang gobyerno, kasi ang alam ko hindi lang mga private sector pati mga LGUs ay gustong rumekta sa kanila? Pero ni-require ba ng mga pharma companies na dumaan sa gobyerno dahil lahat po itong mga bakuna under Emergency Use Authorization lang, di ba?

SEC. ROQUE: Opo, well, sa katotohanan po ngayon, kakaiba itong arrangement natin na bumibili ang mga pribadong sektor. Kahit po sa Amerika, gobyerno po ang nagbibigay niyan. Kahit po sa ating lugar na Inglatera, Danny, gobyerno ang nagbibigay niyan. Wala talagang pribado na nakakaangkat niyan dahil nga experimental use pa lang, hindi siya commercial use. Pero ang lumalabas nga, nagrereklamo iyong ilang mga pribado—hindi naman lahat, mayroon lang isang grupo actually na dapat diretso na kami. Eh paano ka nga didiretso eh hindi ka naman papayagan ng manufacturer na diretsong bumili. Kasi kapag ikaw ay diretsong bumili, it becomes a commercial transaction.

Kapag commercial transaction, eh ‘di labag na iyon sa katotohanan na wala pang fourth clinical trial at hindi ka pa pupuwedeng magbenta on a commercial basis. Now, kung magiging successful ka na makakakuha ka maski walang commercial use na diretso sa manufacturer at mayroong nagkaroon ng side effect eh huwag mong sisihin ang gobyerno, ‘di ba? Tama lang naman iyon ‘di ba? Kaya nga niri-require ng mga manufactures iyong pirma ng gobyerno dahil gusto talaga nila iyong undertaking ng gobyerno na sila ang magbabayad at hindi iyong mga manufacturers kung may mangyari as a result of iyong use of Emergency Use Authorization

VELASQUEZ: Pero po, Secretary Roque, iyon lang dapat siguro malinaw na konteksto na marami ang mga private sector at saka itong mga LGUs na gustong rumekta, ano ang nag-instigate or nag-trigger doon sa statement ni Presidente? Kasi it might send a wrong message ha to the pharma companies na bakit parang confusing iyong statement ni Presidente kung iyon lang ang pupunahin natin iyong part of that sound bite. Siguro dapat ipaliwanag iyon para hindi na naman magkaroon ng delay sa timeline ng delivery ng mga western vaccines po, ‘di ba?

SEC. ROQUE: Wala pong problema kasi doon sa playback ninyo, malinaw na malinaw sa akin, maybe nandoon din po sa echo, kaya malinaw na malinaw sa akin na hindi niya inaamyendahan iyong batas na pinirmahan niya. Malinaw sa mga binigkas niyang salita, kung gusto ninyo talaga na hindi kasama ang gobyerno, eh hindi ako papayag na ang gobyerno ang mananagot ‘no. Siyempre kapag nakapirma ang gobyerno, sagot ng gobyerno. So sa akin po talagang tini-twist lang ng mga kritiko, pero malinaw na malinaw po iyong sinabi niya and thank you nga po for playing it back, kasi mas naging mas malinaw pa sa akin ngayon.

VELASQUEZ: Kasi nga inulit-ulit din naming pinakinggan, Secretary Harry, dahil gusto naming tingnan kung ano nga ba iyong konteksto ng pahayag ng Pangulo. Kasi parang out of the blue, biglang kinuwestiyon niya itong indemnification, so hindi namin alam kung ang tinutukoy nga ba niya ay may butas ba iyong batas.

Mayroon bang something na hindi siya parang agreeing with doon sa batas kaya tuloy, nalito ang mga tao pati iyong ilang mga mambabatas na sila mismo ang nagbalangkas ng batas ay nagtataka bakit kinukuwestiyon daw ngayon.

So ngayon, para lang maulit lang natin ano, ang tinutukoy ng Pangulo lamang ay kung ang private sector mismo ang magpupumilit na rumekta sa manufacturer, hindi po ang gobyerno ang bibili. Tapos iyong private sector ang bibili ng bakuna, kapag nagkaroon ng adverse effects eh parang gobyerno ang magbabayad, iyon ang sinasabi niyang iligal at parang butas, tama?

SEC. ROQUE: Tama po ‘no. At saka iyong isa pang na nais ng—actually, totoo po ito. Mayroong isang manufacturer na nag-insist na dapat under no circumstance silang mananagot. Eh mayroon pong probisyon sa batas natin na excepted doon sa kanilang immunity eh in case of willful neglect and gross negligence, hindi rin payag si Presidente na maski mayroong willful neglect at saka gross negligence eh hindi sila mananagot – sobra naman iyon.

VELASQUEZ: Sige. Mayroon po ba kayang pagkakataon, Sec. Harry, dahil mayroon pong ilang mga nagku-comment po sa Facebook namin ano, na kung si Pangulong Duterte mismo ang magbibigay-linaw sa naging pahayag niya noong Lunes ng gabi, magkakaroon ho kaya ba ng pagkakataon na direktang maririnig natin sa Pangulo iyong mismong paglilinaw niya sa kaniyang binitawang salita noong Monday?

SEC. ROQUE: Tony, noong plinayback mo, naging mas malinaw sa akin kung anong binanggit ng Presidente. Nandoon ako pero siyempre hindi ko naman na-memorize kung anong sinabi niya, pero iyong sa playback mo, malinaw na malinaw sa akin so why he would need to repeat it. Siguro ang konteksto na wala kasi. Ang pangyayari diyan, una, tapos na kami, sabi ni Senator Bong Go, ‘Teka muna, may lilinawin lang tayo, iyong mga private sector na nagrireklamo na gusto nilang dumiretsong bumili.’ Tapos nagsalita si Secretary Dominguez, eh ang problema hindi naman sila pupuwedeng bumili ng diretso because the drug company will require indemnification from the government, so ito na iyong sumagot si Presidente. So iyon iyon, so malinaw na malinaw ‘no. Siguro na-edit iyong sinabi ni Senator Bong Go na, ‘Teka muna, teka, bago tayo magtapos ‘no kailangan nating linawin itong isyu ng mga private companies na gustong dumiretso bumili,’ iyon.

At saka iyong sinabi nga ni Sec. Dominguez na hindi naman nila pupuwedeng gawin iyan kasi hihingan ng manufacturers ng indemnity from the government.

VELASQUEZ: Okay. So para malinawan natin, tapusin natin itong isyu: Hindi kinukuwestiyon ng Pangulo iyong batas na pinirmahan niya for the indemnification ng mga pasyenteng may adverse effects sa bakuna. Hindi niya kinukuwestiyon iyong batas na kaniyang nilagdaan pero ang kinukuwestiyon niya iyang pagpupumilit ng ilan mga pribadong kumpanya na makarekta sa supplier pero hindi sila mananagot sa adverse effects. Tama po, Secretary Harry?

SEC. ROQUE: Tama po iyan kasi nga po ang mga manufacturers ay hindi naman magbibenta ng diretso na walang indemnity galing din sa gobyerno. So ano sila, masaya? [Laughs]

BUENAFE: Iyon ang kailangan lang hong maliwanag kasi iyon iyong nawala yatang—

SEC. ROQUE: Hindi po niya kinukuwestiyon. Alam ninyo, sa panahon talaga ngayon ay napakatindi ng pulitika. Eh ako po noong pinatunog ninyo uli, pina-play ninyo ulit, malinaw naman kung ano ang sinasabi niya eh. Hindi niya po kinukuwestiyon iyong batas na nilagdaan niya ‘no pero ang kinukuwestiyon niya talaga iyong pagpupumilit ng iba na rekta pero bahala ang gobyerno managot. Hindi naman yata tama iyon ‘di ba.

VELASQUEZ: Alam ninyo, Sec. Harry, ako lang ha, isa-suggest ko lang, tutal may mga ganoong paglilinaw sana na gustong gawin ng media sa mga pahayag ng Pangulo, alam ninyo mag-presscon na lang ulit ang Pangulo kasama ang media. Hindi ba puwede iyon? Iyong direktang makikipagtanungan ang mga media sa Pangulo para siya mismo ay maririnig natin sa sarili niyang bibig kung ano iyong ipapaliwanag niya, ‘di po ba?

SEC. ROQUE: Well, parang iyon po yata ang aking trabaho. [Laughs] Maiintindihan ninyo naman kung bakit ang Presidente ay hindi na ginagawa iyan. Kasi makikita ninyo ang aking press briefing dapat from 12 to 1 lang, ang nangyayari ay from 12 to 2. Every press briefing, three times a week, from one hour—nawala na iyong newscast ng PTV-4 dahil nauubos ang panahon sa mga tanong ‘no. Can you imagine paano ang Presidente ay haharap ng tatlong beses isang linggo na tigda-dalawang oras, wala namang limit kasi iyong mga tanong. Alam ninyo naman ang taga-Malacanang Press Corps, kapag ni-limit mo iyan na may tanong pa sila, magrirebelde iyan ‘no.

So ito po, kaya ako ang nagbibigay ng linaw at mabuti na lang po nandiyan iyong tape na ipinilay [played] ninyo para walang kaduda-duda kung anong ibig sabihin ng Presidente.

VELASQUEZ: Hindi, kasi kung minsan naman like iyong mga past administrations, Sec. Harry, nag-cover din naman kami ni Pareng Danny sa ibang naunang Pangulo, may inilalaan lang silang isang araw lang sa isang linggo para sila ay tatanggap rekta ng mga tanong ng mga Malacañang Press Corps or ng Foreign Correspondents Association para from the horse’s mouth ika nga. Pero siyempre, nariyan pa rin po iyong trabaho ninyo on other days para magbigay ng pahayag at saka linaw doon sa policies ang programs ng government.

BUENAFE: Oo. Kasi ho may crisis eh.

SEC. ROQUE: Well, alam ninyo po, ganiyan din naman ang ginagawa niya dati eh. Kaya lang noong isang taong nakalipas ay tumama ang COVID kaya po hindi rin makapasok sa loob ng Malacañang ang mga miyembro ng media kaya pati kami online. So iyon po iyong naging problema talaga ‘no.

At noong minsan naman po, kung naalala ninyo, iyong dumating naman iyong unang Sinovac eh nagkaroon pa ng pagkakataon na diretso nang nagtanong online at saka in person na malayung-malayo ang media, online lang iyong isang reporter ng isang telebisyon pero iyong mga ibang Malacañang Press Corps in person pero ang distansiya nila siguro kalahating kilometro dahil nga po sa panahon ng COVID. At ginagawa naman ni Presidente dati iyan, it’s not as if hindi niya ginagawa bago magkaroon ng pandemya.

VELASQUEZ: Anyway, Sec. Harry, after of course hearing your explanation doon sa naging pahayag ng Pangulo sa indemnification, mayroon nga pong, sabihin na natin na namumuo na tension sa pagitan po ng ating mga COVID task force officials at sa Simbahan Katolika dahil kinukuwestiyon ng Simbahang Katolika iyong ban on religious gatherings habang tayo ay nasa ‘NCR Plus Bubble’ pagkatapos sinasabi nila they will still go ahead with limited, no—

BUENAFE: 10% capacity.

VELASQUEZ: Oo, for the Holy Week, kahit po na may ganitong klaseng pagbabawal nga sa religious gatherings. Ito po ba ay magiging problema para sa mga awtoridad natin?

SEC. ROQUE: Wala pong problema diyan kasi ang Simbahang Katolika nagsasalita po sa pamamagitan ng CBCP. Narinig ko po, tinanong po sa akin ng isang media, hindi ko naman nakita kung ano iyong pastoral letter na iyon na mayroong isang Bishop lang na nagsasabi na susuwayin at magti-ten percent daw sila.

Pero kahapon, nakakuha po ako ng text galing kay Secretary Meynard Guevarra dahil siya po ang assigned na makipag-coordinate sa ating mga religious groups, eh sabi niya wala raw pong problema at nilinaw na, na ang stand ng Simbahang Katolika ay susunod sila sa IATF Resolution. So, wala pong problema kasi talaga namang maski sa Bibliya nakasulat iyan ‘no na kinakailangan sumunod doon sa mga napili ng Panginoon na mamuno.

VELASQUEZ: So, there will not be any repercussion for Catholic Churches that will open their doors for Holy Week masses kung sila naman ay susunod doon sa minimum attendance?

BUENAFE: Occupancy.

VELASQUEZ: Occupancy sa loob ng simbahan.

SEC. ROQUE: Tony, mali ang pagkakaintindi mo. Ang sinabi ko, may text akong nakuha galing kay Secretary Meynard Guevarra at siya po ang in-charge sa mga religious groups, hindi raw po magbubukas ang mga Simbahan. May isang Bishop lang ang nagsabi na magbubukas sila sa 10% pero nagkaroon na po ng kalinawan matapos makipag-usap doon mismo sa organisasyon ng Simbahang Katolika at hindi lang isang Bishop, susunod daw po sila sa resolution ng IATF.

VELASQUEZ: Ah, so hindi sila magbubukas.

BUENAFE: So, walang misa kahit na 10%? Walang misa sa loob?

SEC. ROQUE: Wala po, iyon po iyong text na nakuha ko kay Secretary Meynard Guevarra.

VELASQUEZ: So, iyong Quiapo Church hindi na rin magtutuloy iyon, hindi na rin sila magmimisa?

SEC. ROQUE: Iyan po iyong text na nakuha ‘no. Hindi naman po confidential ito, I’m sure Secretary Guevarra will not mind pero kasi ako [unclear] nakikipag-usap—

BUENAFE: Pero iyong mga outdoor masses katulad ng sa labas ng Quiapo Church na may outdoor, iyong may loudspeaker?

SEC. ROQUE: Iyon nga po, ang nakuha ko is wala na raw pong problema and that there would be a statement to be issued at 7 PM kahapon ‘no. So, wala na pong problema doon sa dalawang Bishop na nagsalita, they will comply daw po.

VELASQUEZ: They will comply, okay. So, walang misa during the Holy Week para hindi na lang po magkaroon ng iringan ang mga awtoridad at mga opisyal ng Simbahan.

SEC. ROQUE: Hindi lang po iringan pero alam naman natin with 8,000 cases a day ay siguro maiintindihan ng tao naman na kung normal na mga pagkakataon eh siguro pupuwede pa natin i-allow itong 10%. In-allow na nga po natin dati at 50%, sumipa pa rin ng 8,000. Ibang klase po itong bagong mutation na ito, itong bagong variant ‘no.

Alam mo, pinag-usapan po iyan na baka pupuwede nang 10% pero ang naging conclusion ng IATF, kasi kung ia-allow mo ang 10%, mas maraming magkukumpul-kumpulan sa labas na naghihintay ng susunod na misa dahil nga napakakaunti noong 10%. So, iyon ang iniiwasan ‘no na kapag 10% ka nga sa loob pero sa labas naman kumpol-kumpulan pa rin sila eh ‘di pareho rin ang suma total ‘no.

At naging kampante naman kami at mukhang naintindihan talaga ng taumbayan na hindi naman natin pinili na biglang nag-8,000 dahil sa mga new variants ‘no. So, siguro bagamat ito ay napaka-importante at lahat naman tayo ay Kristiyano, karamihan sa atin ay Kristiyano ‘no, eh puwede naman nating i-practice ang ating pananampalataya sa ating mga tahanan itong Mahal na Araw na ito.

VELASQUEZ: Pareng Dan, may tanong ka pa?

BUENAFE: Okay na, okay na. Thank you, Sir Harry.

SEC. ROQUE: Okay, maraming salamat po! And Sir Dan, I hope to see you soon and take care!

BUENAFE: Best regards to you! I hope you will soon recover from your infection.

SEC. ROQUE: Oo nga. Hindi ako kagaya mo na nagpunta kay Queen eh ako pa ang nagpositibo.

BUENAFE: Ganoon ba?

VELASQUEZ: Oo nga.

BUENAFE: Okay na. Medyo delikado pa rin doon sa England.

SEC. ROQUE: Oo nga, oo nga. Okay! Maraming salamat po.

BUENAFE: Ingat! Ingat po.

VELASQUEZ: Thank you. Sec. Harry!

##

—
News and Information Bureau-Data Processing Center