Umapela si Agrarian Reform Secretary Conrado M. Estrella III sa lahat na huwag pag-awayin sina Pangulong Ferdinand Romualdez Marcos Jr. at Pangulong Rodrigo Roa Duterte patungkol sa mga usapin na may kinalaman sa repormang agraryo, kasunod ng mga isyu sa mga miyembro ng tribong Ati sa Boracay.
“Gusto ko lang linawin na ang mga nakaraan at kasalukuyang Pangulo ay malaki ang nagawa para sa mga agrarian reform beneficiaries (ARBs),” aniya.
Binigyang-diin ni Estrella na niagdaan at inilabas ni PRRD ang Executive Order No. 75, serye of 2019, para sakupin ang mga hindi na nagagamit na mga government-owned lands (GOLs), na nag-uutos sa lahat ng ahensya ng gobyerno na ipagkaloob sa DAR ang lahat ng mga bukirin na pag-aari ng gobyerno at ilagay ang mga ito sa saklaw ng Comprehensive Agrarian Reform Program (CARP) para ipamahagi. sa mga magsasaka na walang lupa.
Sinabi rin ni Estrella na noong administrasyong PRRD, ipinatupad ng Department of Agrarian Reform (DAR) ang Support for Parcelization of Lands for Individual Titling (Project SPLIT) na pinondohan ng World Bank. Ang Project SPLIT ay kinabibilangan ng paghahati-hati ng collective certificates of land ownership award (CCLOAs) upang maipamahagi bilang mga indibidwal na titulo ng lupa.
Sa kabilang banda, binigyang-diin ni Estrella na ang administrasyon ni Pangulong Marcos ay nagbigay ng karagdagang pondo sa DAR para ito ay makapagbigay ng mga suportang pang-serbisyo sa mga ARB. Nilagdaan din ng kasalukuyang administrasyon ang New Agrarian Emancipation Act of 2023 o RA 11953, na nagbubura sa mga hindi nabayarang amortisasyon, interes, surcharge, at mga multa na umiiral na mga pautang ng mga magsasaka.
Si Pangulong Marcos ay dumadalo sa ilang distribusyon ng CLOA upang personal na ibigay sa ARBs ang kanilang matagal nang nakatakdang mga titulo ng lupa na may mga utos sa DAR na tapusin ang natitirang parselisasyon sa pagtatapos ng kanyang termino.
Sa pinakahuling pamamahagi ng CLOA sa Bago City, nagkaloob si Marcos ng may kabuuang P69.17 milyong halaga ng mga suportang pang-serbisyo sa 19 ARB organizations (ARBOs) sa Negros Occidental.
###
