Maraming, maraming salamat.

Unang-una sa iyong pakilala ng ating butihin na Mayor ng Maynila, Mayor Lacuna-Pangan. At nagpapasalamat din ako bukod pa sa iyong pakilala ay sa napakaganda mong salita na ibinigay sa atin at ang nagbibigay ng pag-asa para sa kinabukasan ng Pilipinas. Iyan po ang ating hangarin. At tayong lahat ay magandang makita na nauunawaan naman ng ating mga kasamahan sa pamahalaan, nauunawaan naman na ito ang tanging pangarap nating lahat. Maraming salamat, Mayor. [palakpakan]

Ang Kinatawan ng Panlimang Distrito ng Maynila William Irwin Tieng; ang mga benepisyaryo ng 4Ps na ngayon ay makakatanggap ng isang sakong bigas na mas malaki pa sa kanila at mas mabigat pa sa kanila; ang mga kapwa kong kasama sa ating pamahalaan; mga kagalang-galang na panauhin, magandang umaga po sa inyong lahat. [palakpakan]

Binabati ko po ng isang magandang umaga ang lahat ng mga nandito ngayon sa San Andres Sports Complex sa Maynila.

Tiyak pong lalong gaganda ang araw ninyo sapagkat ang pangunahing pakay natin dito ay ang pamamahagi ng mga bigas sa ating mga benepisyaryo. [palakpakan]

Bilang Pangulo at Kalihim ng Kagawaran ng Agrikultura, patuloy po tayong gumagawa ng mga kongkretong solusyon upang matugunan ang mga problemang kinakaharap ng sektor ng agrikultura.

Una po, inilunsad natin ang KADIWA ng Pangulo upang pagtagpuin at direktang pag-ugnayin ang ating mga food producers at mga mamimili na konsyumer.

Pangalawa, patuloy pa rin ang ating pagsulong para sa modernisasyon ng pagsasaka—mula sa pagbibigay ng makabagong makinarya, imprastraktura, pananaliksik, hanggang sa pagtatanim, processing, distribution, marketing, hanggang retail po—upang madagdagan ang suplay at ng ani.

Gaya nang sabi ko noong namahagi tayo ng bigas sa Camarines Sur noong isang araw po: Sapat ang suplay ng bigas dito sa Pilipinas. Ang kailangan lamang po ay maayos na pamamahala ng produksyon at bentahan nito.

Sa katunayan, mas malaki ang ani natin noong second quarter ngayong taon kaysa sa second quarter ng nakalipas na taon.

Ang bukbok na lubos na sumisira sa balanse ng suplay at presyo ng bigas sa merkado [ay] ang hoarding at saka ang smuggling, at price manipulation na ginagawa ng mapagsamantalang mga negosyante.

Sa Bagong Pilipinas, hindi na po ito puwede. Ganyan po ‘yung kanilang ginagawa. Unang-una sila ay mag-i-smuggle ng bigas. Ipapasok nila ngayon dito sa Pilipinas. Ngunit, pagpasok dito sa Pilipinas, ‘yang bigas na ‘yan, hindi nila ilalabas sa merkado. Hindi niyo kayang bilhin pa. Hindi nila dadalhin sa palengke. Hindi nila ire-release. Itatago nila ‘yan para pataasin – para mababa ang supply, tumaas nang tumaas ang presyo.

‘Pag mataas na ang presyo, sa kanila ilalabas para kumita sila ng malaki. Hindi naman talaga tama ‘yan dahil ang kanilang ginagawa ay nagbibigay – nagpapahirap sa taong-bayan para lang sila ay makabulsa ng malaking pera. Hindi naman siguro ‘yan ang ating hangarin para sa pagpatakbo, lalong-lalo na sa ating pagpakain at sa pagpapaganda ng agriculture sector.

Dalawa po ang pagpaganda ng agriculture sector, magkabila ‘yan. Dito sa isang panig, ang kailangan natin ayusin ‘yung sektor mismo, mataas ang produksyon, mababa ang cost of production, maganda ang hanapbuhay ng ating mga magsasaka. Mula sa umpisa hanggang sa kadulo-duluhan, sa pag-retail na ng mga bigas ay kailangan ‘yan po ang aming katungkulan. Kailangan ayusin namin nang mabuti ‘yan.

Ngunit sa kabilang panig ay ito nga, hindi natin makokontrol, hindi natin malalaman man lang kung ano ‘yung supply sa Pilipinas kung patuloy itong smuggling. Hindi namin maunawaan kung bakit tumaas ang presyo ng bigas. Bakit tataas ang presyo ng bigas may suplay naman sa Pilipinas? Wala namang nag-panic buying. Walang dahilan kung bakit tataas ang presyo ng bigas kung hindi ang hoarding. Kaya po pinagtibay namin ito.

At kaya inaatasan ko ang lahat ng mga opisyal, mga otoridad, at mga ahensya na higpitan nang husto ang pagpapatupad ng polisiya at batas hinggil sa isyu ng bigas.

Bilang patunay na ang pamahalaan ay seryoso sa pagsugpo sa smuggling – ang mga bitbit po naming mga bigas ngayon ay mula sa mga nakumpiskang suplay sa Zamboanga Port, na napatunayang hindi dumaan sa legal na proseso ng importasyon.

Kaysa naman po masayang ang mga bigas na ito ay minabuti na nating ibigay sa mga mamamayan. [palakpakan]

Dumaan po ito sa tamang proseso ng imbestigasyon, pagkumpiska, at inspeksyon upang matiyak na ito ay ligtas na ipamahagi sa nangangailangan.

Magsisilbing babala rin po ito sa lahat ng mga smuggler at mga hoarder na ang bigas sa bansa ay ating babantayan. [palakpakan]

Sa Bagong Pilipinas, bawal ang smuggler, bawal ang hoarder, at bawal din ang mga mapang-abuso [at] mapagsamantala sa ating bayan.

Asahan po ninyo na hindi kami titigil sa patuloy na pagbuwag sa mga smuggler at hoarder na nagpapahirap sa taong-bayan.

Alam ko pong magiging mahirap ang labang ito dahil matagal na silang namamayagpag sa kalakaran, ngunit desidido po ako na ang buong puwersa ng pamahalaan na matigil na ang mga ilegal na operasyong ito. [palakpakan]

Ang hamon ko sa inyo, mga kapwa Pilipino: Magtulungan po tayo upang maisaayos ang ating agrikultura at maisakatuparan ang pangarap nating Bagong Pilipinas— kung saan matatag, maginhawa, at panatag ang buhay ng bawat Pilipino. [palakpakan]

Sa ating pagkakaisa, tiyak na anumang hamon ay kakayanin at anumang pangarap ay matutupad—basta’t para sa sambayanang Pilipino at para sa Pilipino. [palakpakan]

Muli, marami pong salamat. Isang magandang umaga po sa inyong lahat. Mabuhay po kayong lahat. [palakpakan]

— END —