Sa ngalan ng buong puwersa ng National Task Force Against COVID-19, isang magandang gabi po sa ating lahat.

Nais po naming pasalamatan muli ang lahat ng iba’t-ibang ahensya ng pamahalaan lalo na ang mga taga-pribadong sektor na patuloy na nakikipagtulungan sa ginagawang kampanya ng NTF COVID-19. Sa inyo pong lahat, maraming, maraming salamat po at kami po’y nagpapasalamat sa inyong magandang loob. Sana po ay hindi po kayo magsawa sa patuloy ninyo pong ginagawa na mga proyekto para sa kabutihan at kalusugan ng ating mamamayang Pilipino.

May magandang balita po kami sa inyong lahat. Base sa ginagawang pag-aaral ng University of the Philippines Research Institute, ang Enhanced Community Quarantine na idineklara sa buong Luzon ay naging epektibo laban sa pagkalat ng COVID-19. Ayon kay UP Professor Mahar Lagmay sa isang panayam, maaaring aabot na ang NCR sa tinatawag na peak kung ang pagbabasehan ay ang rate o bilang ng new infections. Maaaring ganito rin ang nangyari sa mga probinsiya at siyudad na nagdeklara ng ECQ.

Ngunit nagbabala din si Propesor Lagmay at Dr. Ted Herbosa na may posibilidad na umakyat muli ang rate of new infection kung ating agarang i-aangat ang ECQ sa Manila at ibang lugar sa bansa. Kaniyang iminungkahi na ang anumang desisyon na gagawin ng pamahalaan ay dapat naaayon sa isang science-based model.

Napakalaki po ng tiwala ng pamahalaan sa ating mga medical and science experts kaya po pinulong ng ating mahal na Presidente ang mga previous Secretaries at saka mga medical experts kagabi. Ito ang dahilan kung bakit pinag-aralang mabuti ng Inter-Agency Task Force ang kanilang mga mungkahi upang ang magiging desisyon ng pamahalaan ay para sa kabutihan ng lahat ng Pilipino.

Noong nakaraang Sabado, ibinalita ni Cabinet Secretary Karlo Nograles ang paglabas ng IATF Resolution No. 25. Isinasaad nito na ang IATF adopts a national government enabled local government unit (LGU)-led and people-centered response to COVID-19 health event. Ibig sabihin nito, ang importansya ng localization ng ating pakikipaglaban sa COVID-19.

Upang maisagawa ang layuning ito, ang iba’t-ibang member agencies ng IATF ay inaasahang bumalangkas ng sector-specific plans, strategies and targets, upang mapalakas pa ang kampanya ng pamahalaan laban sa COVID-19. Ibig sabihin nito, iyong mga resources ng mga agencies natin ibibigay po natin para ma-reallocate doon sa COVID-19 operations po natin.

Ang mga local government units naman ay binigyan din ng direktiba na magkaroon ng regional and provincial cooperation. Sa pamamagitan nito, ang mga LGUs ay maaaring magpalitan ng idea at plano kung ano ang pinaka-epektibong paraan para pigilan ang pagkalat ng COVID-19. Iyong tinatawag nating best practices ng different LGUs katulad ng nangyayari sa Davao at saka nangyayari dito po sa tinatawag nating CAR at dito sa Baguio City.

Sa ilalim din ng Resolution No. 25, ang Department of Health at ang Department of Interior and Local Government ay inaatasang pumasok sa isang data sharing agreement na naaayon sa Republic Act No. 1073 o iyong Data Privacy Act. Ito, iyong contentions dito para at least mapalakas natin ang tinatawag nating contact tracing.

Ayon din sa IATF Resolution, ang DILG kasama ang mga LGUs ang siya nang mangunguna sa pagsasagawa ng contact tracing sa komunidad kasi alam natin iyong mga LGUs sila po, kilala po nila ang mga likaw ng bituka sa buong komunidad. Sila ang nakakaalam ng sitwasyon ng kanilang lugar at may kakayahang mag-identify ng mga posibleng COVID-19 clusters sa mga komunidad.

Ang lahat ng ito ay bahagi ng mga hakbang ng pamahalaan upang bigyan ng mas malakas na papel ang ating mga LGUs at mga leader sa ating mga probinsiya at komunidad sa pagsugpo ng COVID-19. Ang mga lokal na pamahalaan ay kabilang sa ating mga frontliners at dapat silang manguna sa laban na ito. Nakita natin ang mga LGUs na very assertive and aggressive- iyong mga leaders ay nakita natin-dumadapa po ang COVID-19. Sila po ang may mas higit na kaalaman sa kani-kanilang nasasakupan upang mapaigting ang laban kontra COVID-19.

As we have said before, the localization of the implementation of the National Action Plan Against COVID-19 at the regional, provincial, municipal, city and barangay levels is key to beat COVID-19. Ang paglakas ng kapasidad ng ating mga LGUs at magkaroon sila ng health resiliency ang magiging susi sa ating tagumpay.

Malaki po ang nakita nating improvement sa ating kapasidad na mag-detect ng COVID case noong tayo ay nagsimulang magsagawa ng localized targeted testing sa buong bansa noong April 14. Nauna natin ang mga suspected COVID cases at most vulnerable members of society katulad ng mga matatanda, buntis at ang mga compromised health and immunity at ang healthcare workers.

Malaki ang naitulong ng targeted massive o tinatawag nating expanded testing upang magkaroon tayo ng isang holistic assessment ng ating public health situation base sa mga kumpirmadong kaso, sa mga tinatawag nating mga—sinasabi nating granular information sa mga lugar na apektado ng COVID-19.

Kaya naman po masaya po akong ipamahagi sa inyo ang balita na binuksan na po ng Philippine National Red Cross ang kaniyang state-of-the-art molecular testing laboratory sa Lungsod ng Mandaluyong ngayong araw. Ito po ay magkakaroon ng tinatawag na extensive, expanded testing sa buong NCR, na kukunin niya po at tetestingin niya po ang more or less 10,000 to 12,000 PUIs and PUMs.

Ang target po ng Philippine National Red Cross ay magkaroon ng 12 polymerase chain reaction or PCR machines sa NCR at ipinakita po sa amin iyong mga automated retraction-machine na kaya pong bumasa ng test 1,000/day. May kakayanan po itong makapag-test ng 12,000 test kada araw kapag ito po ay nagkaroon po ng tinatawag nating iyong kaniyang experience curve ay tumaas na po.

Ibinahagi din po sa atin ng Philippine National Red Cross ang kanilang plano na maglagay ng testing laboratories sa iba’t-ibang panig ng bansa. For example, doon sa Mindanao, sa Visayas at dito sa Luzon na hindi naaabot ng ibang mga laboratory ng ating pamahalaan.

Ang kampanya ng Philippine National Red Cross ay malaking tulong sa layunin ng pamahalaan na ma-test ang humigit-kumulang na dalawang milyong katao sa buong bansa, kasama na po ang mga incoming OFWs na darating po ngayong mga buwan.

This plan will provide the government the critical data and analysis to help address the crisis brought about by COVID-19. Kaya po nagpapasalamat po kami sa kapulungan ng Philippine National Red Cross sa pangunguna ni Senator Gordon, ang kanilang mga kasamahan, ang kanilang mga private donors at saka mga foreign donors sa kanilang walang sawang pagsisikap para tulungan ang gobyerno na makatugon sa ating crisis na hinaharap ngayon.

Kaya nga po nais ko pong ulitin na ang laban na ito ay magiging mas mainam kung tayong lahat sa gobyerno, pribadong sektor, mga CSO, o isang ordinaryong mamamayan ay magkakaisa bilang isang sambayanang Pilipino, kaya nga tinatawag nating bayanihan.

Sa karagdagang ulat, mayroon na po tayong 52,837 individuals tested. So, napakataas na po ang ating antas ng pagte-testing. Inaasahan po natin na mas dadami pa ang bilang na ito pagkatapos ng accreditation ng iba pang mga testing laboratories nationwide.

Sa kasalukuyan ay patuloy nag-aangkat ang gobyerno sa kabuuang 900,000 PCR test kits at dalawang milyon na rapid test kits. Nandoon na po sa pipeline at baka dumating na po ang mga ito sa susunod na mga araw.

Nasa 3,052 quarantine facilities din po ang na-establish natin sa buong bansa para sa ating suspected na mild COVID-19 patients. Ang mga quarantine facilities na ito ay kayang tumanggap ng more than 200,000 na mga pasyente.

Dagdag pa rito, ang Philippine Health Insurance Corporation o PhilHealth ay magbibigay ng assistance packages para sa COVID-19 positive patients na nakumpirma mula April 15 hanggang sa kasalukuyan.

Upang makasiguro naman ang lahat po ng suportang medikal ay makakarating sa ating frontliners sa bawat sulok ng bansa, ang lahat ng air, sea and land transportation assets ng ating Sandatahang Lakas ay naka-deploy na rin kasama po iyong mga assets ng ating DOTr.  Upang mapalakas ang ating kapasidad sa pag-transport ng PPEs, dadagdagan ng Philippine Air Force ang biyahe ng kanilang c-130. Mula isa ay gagawin nang dalawang biyahe kada araw para mapataas ang hauling capacity ng PPEs at magkaroon tayo ng stockpiling ng ating mga PPEs at magkaroon po tayo ng mga tinatawag na strategic reserve.

Lubos na rin pong nagpapasalamat ang ating pamahalaan sa international community sa kanilang tulong sa ating bansa. Ang Department of Foreign Affairs ay nakapagtala ng 44 international assistance donations at noong isang araw ay ating sinend-off ang ating mga tinatawag na technical experts from China. Nagpapasalamat po kami sa ating mga kaibigan na mga expert from China na tumulong po sa atin.

Kasama sa mga donation na ito ay ang testing kits, surgical at N95 masks, PPEs, medical gloves, face shields, ventilators, PC machines, iyong mga thermal scanners and other assorted medicines and financial assistance.

Upang matiyak naman na stable ang presyo ng supply ng mga agricultural products at iba pang essential food items, ang Department of Agriculture (DA) at Department of Trade and Industry (DTI) ay mahigpit na nagpapatupad ng mga alituntunin upang masiguro na ang mga merkado ay sumusunod sa suggested retail price at price freeze policy sa buong bansa. Sinusuportahan din ng Department Trade and Industry ang local productions ng sampung libong PPEs at may ginagawa pang karagdagang 74,000 sa production line.

Napakahalaga po na naitayo natin ang kakayahang makagawa ng sarili nating PPEs at masks nang sa ganoon ay hindi na natin kailangang mag-angkat mula sa ibang bansa, at mabibigyan din po natin ng trabaho ang ating mga sariling manggagawa.

Patuloy rin po ang pakikipag-usap ng Department of Agriculture sa ating mga LGUs upang makasiguro na walang delay o unnecessary restrictions sa food production, transport and trade habang ipinapatupad ang community quarantine sa kani-kanilang mga lugar. Ito pong mga nabanggit ay naaayon sa kagustuhan nating maiwasan ang artificial supply shortage at pagtaas ng mga bilihin.

Hindi po ito ang panahon upang manlamang sa ating kapwa. Inuulit po natin ang ating babala sa mga kasamahan nating gustong mang-isa, sisiguraduhin po namin na mananagot po kayo sa batas. So, be fair to our consumers.

Sa usapan po ng ECQ or lockdown, mas mainam na pumulot ng aral sa mga naranasan ng ibang bansa tulad ng nangyayari ngayon sa Singapore at iba pang lugar. Noong mga nakaraang buwan ay naging halimbawa ang Singapore sa pagkakaroon ng isa sa mga pinakamahusay na sistema kung paano epektibong harapin at pigilan ang pagkalat ng COVID-19.

Ngunit dumating ang tinatawag na second wave of infections sa bansa, mula sa 266 na kaso noong March 17 ay biglang lumobo o umakyat ang bilang na ito na halos 6,000 sa kasalukuyan. Bakit po nangyari ito? Bagamat ang pamahalaan ng Singapore ay nagpatupad agad ng mass testing at social distancing ay hindi po nila idineklara ang ECQ o lockdown sa buong bansa. Sinabi ng mga eksperto na ito ay marahil ang isa sa mga dahilan ng mabilis na pagtaas ng rate of new infection; kaya masuwerte po tayo at mayroon po tayong lockdown. Ang nangyari po sa Singapore ay isang malaking patunay na hindi po tayo dapat magkumpiyansa. Ganito rin po ang nangyari sa ibang lungsod po sa Japan at iba pang mga countries.

Ang tanong po: Kaya ba nating harapin ang sitwasyong ganito at makita natin ang libo-libung namamatay sa ating harapan?

We cannot rush into normalcy. Kailangan dahan-dahan at calibrated ang ating mga hakbang, ang tinatawag nating tingnan natin ang tradeoffs at saka iyong mga consequences ng lahat ng ating desisyon.

Dahil dito, kinakailangang ipagpatuloy at mapaigting ang pagpapatupad ng kasalukuyang ECQ. Kasabay nito ang mas mainam ang pagpapatupad natin ng mass testing to locate, test, isolate and cure strategy na bahagi ng ating National Action Plan Against COVID-19 upang mas lalo pa nating mapababa ang bilang ng mga may sakit at namamatay.

Kaya’t akin pong inuulit: kung hindi kinakailangan, huwag po tayong lumabas ng bahay, tago lang tayo sa bahay. Magkaisa po tayo sa adhikaing pagbabantay sa kalusugan ng ating mamamayang Pilipino at kalusugan ng ating mga pamilya.

Let us exercise discipline and patience. Hindi po ito panahon para mag-inuman sa kanto, magsabong, mag-party at gumala-gala sa labas ng inyong pamamahay. May mga nakikita pa rin po kami na pami-pamilya kung mamili sa palengke at sa supermarket, bawal po ito. Base sa ECQ guidelines, iisa lamang po ang maaaring lumabas kada pamilya para mamili. Kinakailangang mag-sakripisyo po muna tayo para sa ikabubuti ng lahat at ikabubuti ng ating pamilya. Hindi po madaling ma-confine sa ospital nang mag-isa at malayo sa inyong pamilya kapag kayo tinamaan ng COVID. Napakasakit na kayo po ay maiiwan na nag-iisa doon po sa ospital.

Kapag tayo po ay lumabas, napakataas ng tsansa na tayo ay makahawa at mahawa ng sakit at lumaon ay makakahawa sa iba at sa ating pamilya. Kaya nga kung tunay na mahal natin ang ating mga mahal sa buhay, ang ating anak, ang ating asawa, manatili na lamang po tayo sa ating mga tahanan. At kung tayo man ay lalabas, magsuot po tayo ng face mask at sumunod sa social distancing at huwag po tayong humawak kung saan-saan.

Sumunod po tayo, stay at home, observe social and physical distancing, wear our face mask always and we have to protect our elders and sickly. Ugaliin ang kalinisan, maghugas lagi ng kamay at i-observe natin ang personal hygiene. Be self-aware sa ating kalusugan at sa ating immune system.

Ang tagumpay po ng ating kampanya laban sa COVID ay nakasalalay sa mahusay at sama-samang pagpapatupad sa bawat probinsiya, munisipalidad, lungsod, barangay at sa lahat ng ating mga pamayanan. Kaakibat dito ang kooperasyon ng bawat ng mamamayan at ng bawat isa.

Maraming salamat po sa inyong lahat. Tapang, malasakit, bayanihan, kaya po natin ito. Together, we heal as one.

Magandang gabi po sa inyong lahat at mabuhay po ang Pilipinas.

####