USEC. IGNACIO: Magandang umaga Pilipinas at sa lahat ng mga Pilipino saan mang dako ng mundo. Atin pong kumustahin ang mga paghahandang ginagawa ng mga local governments dito sa NCR sa nalalapit na Kapaskuhan gayun din po ang paghahanda naman ng education sector sa pagbabalik ng face-to-face learning at mamaya isang programa naman po ng GSIS ang ipapaliwanag ng ahensiya sa mga member-borrowers nito, yan po ang istoryang tututukan natin ngayong araw ng Miyerkules, November 3.

Ako po ang inyong lingkod, Usec. Rocky Ignacio ito ang Public Briefing #LagingHandaPH.

Samantala, nagtakda ng ultimatum ang ilang private hospital organization na hanggang sa November 15 ay hihintayin nila ang pagbabayad ng PhilHealth para sa kanilang unpaid claims na nagkakahalaga ng 20 billion pesos. Kaya naman kahapon ay personal nang pinaalala ni Senator Bong Go sa PhilHealth na ayusin na ang mga dapat nitong i-settle sa mga pribadong ospital. Narito ang detalye:

[VTR]

USEC. IGNACIO: Ngayon pa lamang ay pinaghahandaan na ng Metro Manila Council ang posibleng pagdagsa ng mga tao sa mga lugar pamilihan at pasyalan dito sa Metro Manila dala po ng nalalapit na holiday season. Ano kaya ang magiging epekto nang kakaanunsiyo lamang ng pag-alis na ng curfew sa buong rehiyon simula November 4, iyan po ang ating aalamin mula kay Pateros Mayor Miguel Ponce III. Good morning po, Mayor.

PATEROS MAYOR PONCE III: Good morning po, Usec. Rocky. Magandang umaga po sa inyo.

USEC. IGNACIO: Mayor, inanunsiyo nga po ni MMDA Chairperson Benhur Abalos na aalisin na po iyong curfew sa Metro Manila simula bukas. Bakit po napagkasunduan ng mga NCR mayors na totally alisin na po ito?

PATEROS MAYOR PONCE III: Actually bahagi ito noong ating ginagawang pagtugon ano para makabawi iyong economy natin especially ngayong panahon ng Christmas season at palagay ko ay ito rin ay nagiging bunga ‘no noong mababang bilang ng COVID-19 virus na naitatala dito sa Kalakhang Maynila nitong mga nakaraang araw at linggo ‘no; kaya lahat naman kami ay sang-ayon dito kaya’t pinaghahandaan natin ang implementasyon nito by November 4.

Pero sa amin kasi ay nakaplano kami, ngayong araw na ito maglalabas ako ng executive order at iri-request ko rin sa ating Sanggunian na magkaroon ng special session para i-lift iyong curfew pero hindi natin isasama dito iyong mga minor ‘no, iyong mga below 18 maliban na lamang kung sila ay kasama ng magulang ano sa oras na itatakda natin na puwedeng may curfew pa rin para sa kanila.

USEC. IGNACIO: Opo. Sa pagkakaalam ninyo, Mayor, aside from Pateros, mayroon pa rin po bang ilang LGU na talagang magpapatupad pa rin po ng curfew sa mga menor de edad?

PATEROS MAYOR PONCE III: Ang alam ko sa aming pag-uusap ay mayroon silang existing curfew eh ‘no, mayroong ilang LGU na may existing curfew even before the pandemic ano sa mga minors, iyong below 18. Ngayon iyong mga wala katulad namin dito sa bayan ng Pateros ay I am inclined to request our Municipal Council na magpasa ng ordinansa na panatilihin ang curfew doon sa mga below 18.

Katulad nga ng sabi ko maliban na lang kung sila ay kasama ng magulang, ibig sabihin kung sila’y lumabas bilang pamilya o sila ay kasama ng nanay or tatay nila, papayagan natin ito kahit beyond 12 midnight pa.

USEC. IGNACIO: Opo. Mayor, basahin ko lang po itong tanong ni Evelyn Quiroz ng Pilipino Mirror ano po: Sa pagtanggal nga po ng curfew hours, may mga guidelines po ba na napag-usapan na ipatutupad ang mga mall operators kung sakali pong habaan nga po ang oras ng kanilang operations?

PATEROS MAYOR PONCE III: Sa ngayon ay wala pa kaming pirming usapan with mall operators. Pero ang tingin ko rito ay maski matanggal natin iyong curfew ay magiging mahigpit pa rin sa mall dahil kahit naman tayo medyo maluwag na ngayon ay mayroong mga sariling patakaran na pinapatupad ng mga malls natin ano. At nasa malls pa rin iyan, iyong mga operator at owner ng mga malls kung ano rin iyong mga papayagan nila ano dahil siyempre pare-pareho pa rin naman tayong nag-iingat at ayaw nating maging complacent at mabigla na magluluwag tayo at pagkatapos babalik uli tayo doon sa surge na dati na nating naranasan.

USEC. IGNACIO: Opo. Mayor, ‘pag sinabi ninyong menor de edad, mga anong edad po ito at kung nagkaroon na rin po ba ng kasunduan kayong Metro Manila Mayors kung papayagan na itong mga minors na lumabas at magpunta sa mga mall?

PATEROS MAYOR PONCE III: Actually sa ngayon, Usec. Rocky, ay pinapayagan naman natin iyong mga minors sa labas basta’t kasama iyong mga magulang. Kaya lang iyong mga pupunta sa malls ay mayroon pa ring mga niri-restrict dito ‘no, marami pa rin pong mga malls na ayaw pumayag na masyadong mga bata pa ay pumapasok sa loob nila ‘no. Dito sa gagawain nating pagbabago ngayon ay mas magiging maluwag pero palaging kasama ang magulang kailangan para mayroong nagsu-supervise sa kanila at nang matiyak natin na hindi lang basta kaya sila lalabas ay gagala lamang o kung saan lamang pupunta – kailangan ay under the supervision pa rin ng parents, oo.

USEC. IGNACIO: Opo. Diyan po sa Pateros, mga anong edad ninyo po puwedeng payagan itong mga menor de edad?

PATEROS MAYOR PONCE III: Papayagan namin dito kahit anong edad ano, kahit anong edad… hanggang 17 as long as they are accompanied by parents. Ngayon ‘pag halimbawa hindi sila accompanied by parents, ang pinaplano namin ay mananatili pa rin sila sa loob ng bahay nila at mananatili pa rin ang curfew sa kanila ‘pag hindi sila accompanied by parents ‘no para maiwasan lang natin iyong paggala noong mga bata dahil baka mamaya maging tiwala na tayo ay bumalik tayo sa dating problema.

Ngayon pagdating doon sa mga ibang ginagawa naman natin, nakasanayan nating ginagawa sa tuwing panahon ng Kapaskuhan, palagay ko mas magiging maluwag naman tayo ‘no kaysa doon sa ginawa natin last year dahil nakita naman din iyong difference ngayon dahil bakunado na nga iyong mga tao at dito nga sa aming bayan ay naabot na rin namin iyong herd immunity, oo, dahil sa dami ng nabakunahan natin.

USEC. IGNACIO: Opo. Mayor, pero kung kayo po iyong tatanungin ano po, pabor po ba kayong ibaba na sa Alert Level 2 ang National Capital Region by the second half of November o gaya po ng panawagan ng business sector?

PATEROS MAYOR PONCE III: Actually, Usec., sa tingin ko nagluluwag naman tayo nang konti ano kasi ina-adjust natin ito, nagkakaroon tayo ng mga kombinasyon na ina-apply natin. Baka mas magandang nasa Level 3 pa rin tayo ano bagama’t magkakaroon nang konting pagluluwag pa. Dahil ang sa akin, kung ako ang tatanungin ninyo, mas gusto kong dahan-dahan kaysa naman biglain natin ito at magkaroon na naman ng problema.

USEC. IGNACIO: Opo. Mayor, bukas po ay sisimulan na rin ang pilot run nang increased capacity ng mga public utility vehicles dito sa Metro Manila. Kayo po ba ay may ginagawa ring paghahanda para po maasistihan at mabantayan ang ating mga pasahero at driver bukas?

PATEROS MAYOR PONCE III: Yes, tsinitsek naman natin ito ‘no, kailangan iyong social distancing pa rin. At kung itataas na natin sa 70 ito ay wala rin naman tayong tutol dito dahil gusto ko rin ay makabawi rin at mabuhay naman itong ating mga nasa public transport dahil ang nakikita nga natin dito, Usec., ay patuloy ang pagtaas ng presyo ng krudo, ng gasolina, samantalang patuloy din naman iyong pagpigil natin sa kanila para makapagsakay nang mas marami.

So okay sa atin itong 70 pero iyong protocol ay susundin pa rin, kailangan kahit papaano ‘no, dahil hindi naman natin iwa-one hundred capacity ito ay mayroon pa ring social distancing at dapat iyong barriers ay nandudoon pa rin. At as much as possible ay talagang fully vaccinated iyong mga lalabas dahil ini-encourage natin talaga ang lahat ng tao na magpabakuna.

USEC. IGNACIO: Opo. Mayor, sa inyo po diyan sa Pateros, may mga lugar pa po ba kayong naka-granular lockdown? At kumusta po iyong pamimigay ng ayuda sa kanila, kung mayroon pa po?

PATEROS MAYOR PONCE III: Dito sa amin, Usec., ang in-apply natin ay iyong house granular lockdown. Iyong mga bahay ng close contact at saka iyong positive ang nila-lockdown natin at binibigyan natin ng ayuda. Medyo mababa na ito ngayon, kakaunti na dahil sa ngayon ay mayroon na lang tayong 31 cases ng positive at confident ako na today ay bababa pa iyan kaya maliit na lang. Pero tuluy-tuloy pa rin, hindi naman natin pupuwedeng tigilan ito.

USEC. IGNACIO: Opo. Although, maganda rin iyong vaccination rate sa NCR, ano po iyong efforts naman na ginagawa ninyo diyan sa Pateros at ng iba pang Metro Manila LGUs para po palakasin pa itong kasunod nitong “Vax to the Max” strategy?

PATEROS MAYOR PONCE III: Sa kasalukuyan ay nagbabakuna kami ngayon ng 12 to 17, ano. Ngayon kami nagsimula at ito nga ay ginagawa namin sa aming vaccination center. At itong araw na ito ay sinabihan din kami at alam ko nagkaroon na kami ng kasunduan sa ACE (Allied Care Experts) Hospital na tutulong na rin sila, sasabay sila ‘no.

At ganoon din, Usec., nagbabakuna rin kami ng tagalabas. Tumatanggap kami ng tagalabas matagal nang panahon para matulungan din namin iyong ibang lugar dito sa NCR at sa mga karatig na probinsiya para mapabilis din ang pagbabakuna sa kanila. So pagdating naman sa vaccination ay talagang mabilis na mabilis ang nagiging pagkilos natin at wala naman kaming mga major problems na na-encounter dito.

USEC. IGNACIO: Opo. Nabanggit ninyo na rin po iyong pediatric vaccination, ilan na po ba iyong nabakunahan diyan sa ngayon na mga kabataan, Mayor?

PATEROS MAYOR PONCE III: Ngayong araw lang kami nagsimula, ngayon lang araw na ito kaya wala pa kaming datos ‘no. Pero, Usec., ito ay dinadahan-dahan namin dahil mga bata ito at gusto nating makatiyak na walang masyadong magiging problema sa kanila. Pero kapag nakita natin ito na maayos, by next week ay ipu-full blast na namin ito. At confident naman kami na before the end of this year ay mababakunahan natin lahat ng mga 12 to 17 years old dito sa aming bayan.

USEC. IGNACIO: Opo. Mayor, kami po ay nagpapasalamat sa inyong panahon at pagbibigay ng update, Pateros Mayor Miguel Ponce III. Mabuhay po kayo and stay safe po, Mayor.

PATEROS MAYOR PONCE III: Usec. Rocky, maraming salamat po. Mabuhay po kayo. Mag-ingat po tayo. Thank you very much.

USEC. IGNACIO: Samantala, base pinakahuling tala ng Department of Health, nadagdagan ng 2,303 ang mga nahawahan ng COVID-19 sa bansa kaya naman sa kabuuan ay umakyat na ang bilang sa 2,792,656 total cases. Doble naman ang mga bagong kaso na naitalang gumaling, 4,677 new recoveries po iyan para sa 2,708,466 total recoveries. Forty-three thousand four hundred four (43,404) naman ang lahat ng naitalang nasawi dahil sa sakit matapos itong madagdagan kahapon ng 128. Sa kasalukuyan, 1.5% ng total cases o katumbas ng 40,786 ang mga pasyenteng nagpapagaling pa rin mula sa COVID-19.

Samantala, kinumpirma naman po ni Senator Bong Go na muling magpupulong ang PDP Laban sa mga susunod na araw para isapinal ang mga kandidato nila na tatakbo sa eleksiyon 2022. Isa rin po sa isinusulong ng partido ang pagtakbo ni Pangulong Rodrigo Duterte sa pagka-senador. Narito ang report:

[VTR]

USEC. IGNACIO: Ngayong araw ang pormal na pagsisimula nang mas pinalawak na pediatric vaccination sa bansa. Makibalita tayo sa nangyayaring bakunahan ngayon sa Lungsod ng Maynila, nakatutok doon si Patrick de Jesus. Patrick?

[NEWS REPORT]

USEC. IGNACIO: Maraming salamat sa iyo, Patrick de Jesus.

All set na po ang pagbabalik ng face-to-face classes para sa mga piling paaralan sa bansa sa darating na November 15. At para makibalita tungkol diyan, muli po nating makakasama mula po sa Department of Education si Secretary Leonor Briones, kasama po sina Undersecretary Alain Pascua, Assistant Secretary Alma Ruby Torio at Assistant Secretary Malcom Garma. Magandang umaga po sa inyong lahat.

DEPED SEC. BRIONES: Magandang umaga, USec. Rocky!

Magandang balita: Sa wakas ipagpatuloy na natin ang ating limited face-to-face. Tulad ng napag-usapan at instruction ng President, mag-umpisa tayo with 100 public schools; 20 private schools; at iilang mga international schools na may sarili naman silang mga patakaran.

So, all set na for November 15, nabuo na natin ang 100 public schools at binubuo na ngayon ang 20 private schools. Ang ating Undersecretary na si Nepo Malaluan ngayon ay nasa probinsiya naglilibot para tingnan ang total readiness ng mga eskuwelahan na ating napipili.

It will be recalled, USec. Rocky, we started with 1,900, ni-reduce natin ito to 638, tapos naging 329, ngayon ang usapan natin ay 100 schools at handang-handa na tayo. Kung ano ang resulta nitong ating pilot study, puwede nating i-extend ito at lalong paramihin natin ang mga eskuwelahan na magkaroon ng face-to-face classes. So, we’re all set, USec.

Una, nakuha natin ang consent ng local governments; ni-require din natin na ang mga parents dapat magbigay sila ng kanilang written consent at kami naman for our part sa Department of Education ini-inspect namin ang mga napipiling eskuwelahan na kailangan handa iyong ating mga facilities, ang social distancing, may tubig, may gamot, malapit tayo sa mga health stations, at saka finally, kailangan na may risk assessment na galing sa Department of Health.

Ito iyong dagdag ng Presidente sa kaniyang mga requirements para maumpisahan na talaga itong ating face-to-face pilot session. So, all set na tayo, USec. Rocky.

USEC. IGNACIO: Opo. Secretary, may tanong lang po sa inyo si Evelyn Quiroz ng Pilipino Mirror: What were the factors considered in arriving at this decision na payagan po itong 90 or 100 school na po ngayon ano; at sinu-sino po ang mga nakonsulta ninyo tungkol dito?

DEPED SEC. BRIONES: Ilang buwan na ito, last December pa kami nag-umpisa. As I said, we started with 1,900 schools, na ni-review ito ng ating mga regional directors pagkatapos ni-reduce natin to 638 dahil sabi ng Senado at ng legislature sobrang malaki iyong sample natin. Furthermore, ni-reduce pa rin natin para masigurado talaga tayo na all factors are involved. Tapos finally, we settled for 100.

Ano iyong mga kondisyon:

• Una, kailangan pumayag ang local government; with the consent of the local government.
• Secondly, kailangan may written consent ang mga parents na iyong kanilang anak ay sasali sa face-to-face.
• Thirdly, kailangan ang ating facilities sa Department of Education ay appropriate para sa face-to-face in terms of space, in terms of distancing, availability of water, medicines, emergency actions – mayroon naman tayong emergency procedures kung sakali man na magkaroon ng problema;
• And finally, pati iyong mga nagbibigay ng services sa ating mga eskuwelahan – mga buses, transportation, uniforms, pagkain, kailangan makikisunod sila sa mga requirements ng ating Department of Health.

So, lahat ng paraan ginamit natin to assure the safety of the students, I don’t think any country in the world has put out such stringent and very, very strict requirement for face-to-face particularly the consent of the parents.

In other countries, hindi naman kailangang hihingi ng permiso sa parents, they were informed. Pero sa atin, sabi natin, walang sapilitan. Tapos we’re assuring also that our children sa 12-17 umpisahan na sila na i-vaccinate.

Although lahat ng pag-aaral, USec. Rocky, nagpapakita ng mga bata mas mataas ang resistensiya nila sa COVID-19 kaysa sa mga matatanda. Maraming pag-aaral na nagpapakita nito sa buong mundo pero we are not taking any chances at all. So, iyon.

USEC. IGNACIO: Opo. Para po kay ASec. Alma: Ano daw po ang dahilan kung bakit uunahin ng one week ang face-to-face learning sa DepEd school kaysa daw po sa private school na naka-schedule by November 22?

DEPED ASEC. TORIO: Magandang umaga, USec. Rocky at sa lahat.

Kagaya po ng nasabi ng ating mahal na Kalihim, ang mga public schools po natin na nagsumite ng kanilang intent ay they were subjected sa mga evaluation process; so, ganito po rin ang mangyayari sa ating mga pribat4e schools na nag-apply po na sumali po dito sa implementation po ng face-to-face classes po natin.

So, nauna nga po – tama po kayo – nauna nga po ang ating mga public schools ay ito po ay—iyong pag-evaluate po ng ating mga public schools ay ganoon din po ang mangyayari sa ating mga private schools po.

Maraming salamat, USec. Rocky!

USEC. IGNACIO: Opo. Pero, ASec. Alma, sa ngayon po ba ay ilang private school ang pasado na para po makasali sa pilot implementation ng face-to-face learning?

DEPED ASEC. TORIO: USec. Rocky, siguro po gusto ko pong makinig po sa sasabihin po ng ating ASec. sa regional operations, mas lalong kumpleto iyong datos niya sa mga nag-apply po ng implementation ng face-to-face classes natin na galing sa private schools.

Iyong alam ko lang po ay iyong sa ManCom meeting namin last week at alam ko mayroon pa pong karagdagang ito. So, sa pahintulot po ni Secretary, ma’am, puwede pong si ASec. Malcolm na lang po iyong pasagutin po natin sa mga datos sa private schools?

Maraming salamat po.

USEC. IGNACIO: Opo. Kasama po ba natin si ASec. Malcolm?

DEPED ASEC. TORIO: Yes, USec.

USEC. IGNACIO: Opo.

DEPED SEC. BRIONES: O, siya.

USEC. IGNACIO: Okay. Tanong muna po kay—Teka muna. Nakasama na po ba natin siya or magtanong po muna tayo—

Secretary, balikan ko po muna kayo. Kumusta daw po ang vaccination status ng mga personnel na nagtatrabaho sa mga eskuwelahang sasabak ulit sa face-to-face learning?

DEPED SEC. BRIONES: Very, very high! Very high ang vaccination status. Si USec. Alain puwedeng magbigay ng karagdagang impormasyon.

Pero napakataas kasi summer pa, wala pa iyong approval ng President sinabihan na namin iyong aming mga teachers na makikilahok sila kasi iyong ating local government napakasipag sa pagbigay ng mga—iyong sa vaccination. So, sabi namin, mag-report kayo sa inyong mga local governments, magpabakuna kayo kasi ina-anticipate namin na dadating at dadating ang panahon na papayag na ang Presidente.

So, si USec. Alain puwedeng magbigay ng actual data pero napakataas ng lebel ng compliance ng ating mga teachers at mga staff. USec. Alain?

DEPED USEC. PASCUA: [technical glitch]

USEC. IGNACIO: Okay. Usec. Alain, babalikan po namin kayo, medyo hindi po maganda iyong linya ng komunikasyon namin sa inyo. Balikan ko lang po si Secretary Briones. Ilan na raw pong teaching at non-teaching staff and inihahabol pa para ma-fully vaccinate sa mga eskuwelahang ito? Babalikan po namin si Usec. Alain, Secretary, medyo hindi lang po naging maganda iyong ating linya ng komunikasyon.

DEPED SEC. BRIONES: Ang pagkakaalam ko, halos lahat ng mga teachers na magpa-participate sa atin, kasi we are talking here of 100 (public) schools and perhaps 20 private schools. Hindi naman kalakihan iyong number ng mga teachers at mga staff na kailangang makikilahok dito. We have more than 61,000 schools all over the country and we are picking out 1oo. So, very close ang ating pag-monitor dito. Ang pagkakaalam ko practically, halos lahat na ng ating mga teachers at mga staff – ako ang nangunguna, fully vaccinated ako, ang aming mga staff sa central office, fully vaccinated at karamihan, pumunta na sa local governments, napakalaki ng papel ng local governments. Dahil sila ang unang nag-initiate nitong vaccination at sumali ang mga teachers. Kasi ang original ranking ng teachers ay stage 4 pa kami. Pero ngayon, maraming-marami na talaga at saka with the policy of vax to the max ay mas lalong kung may mga natitira naman iyong mga tig-one injection, one vaccination, tapos kulang na lang ng one more.

Ang sabi dito sa ating data, eh more than 90% na ang ating vaccinated na nakatanggap na ng first dose, tapos mayroon namang nakatanggap ng full dose like me na wala namang masyadong adverse effects. So, in that sense, handa na talaga ang schools. Kung mayroon man ay we will make sure that they will be vaccinated as soon as possible. Nandiyan naman ang local governments. Baka puwede nang sumali si ASec. Garma, Usec. Rocky at si ASec. Alain, nakikita ko sa kanilang mukha na gusto na nilang sumali sa aking conversation.

USEC. IGNACIO: Secretary, opo, balikan po natin si ASec. Garma.

Asec. sa ngayon po ba, ilang private schools ang pasado na para makasali sa pilot implementation ng face-to-face learning?

DEPED ASEC. GARMA: Okay. Magandang umaga, Usec. Rocky at magandang umaga sa lahat ng tagasubaybay ng Laging Handa. Sa ngayon po, Usec. Rocky, hindi pa po pinal iyong desisyon kung sinu-sino iyong dalawampung pribadong paaralan ang lalahok dito sa ating face-to-face. Pero sa ngayon po, mayroon na po tayong 57 private schools that have been submitted already for evaluation. Sa November 12 po natin malalaman, batay po sa nangangasiwa nito na si Director Joy Sandaya, ay November 12 po natin malalaman kung sino po iyong 20 private schools ang mapipili po batay po sa ginagawang evaluation ngayon.

USEC. IGNACIO: Opo. Balikan ko po si Secretary Briones. Secretary, ngayon pong iba’t ibang eksperto na ang nagsasabi na low risk na po ang Metro Manila mula sa COVID-19, possible po bang ikonsidera ng DOH at ng DepEd na payagan na rin daw po dito sa NCR ang face-to-face learning?

DEPED SEC. BRIONES: Sa tingin ko siguro by the second batch, kasi nakapili na tayo ng 100 at saka malaki ang aming tiwala sa advice ng Department of Health. Kasi iyong risk assessment, ang Department of Health ang gagawa niyan. May mga lugar, halimbawa sa Metro Manila na medyo tinitingnan pa nila nang husto ang extent ng COVID. May mga lugar naman na sa tingin nila ay medyo puwede na siguro. So, we will be relying very heavily on the assessment of the Department of Health kasi para sa amin, basta papayag ang local government, papayag ang parents.

At saka importante kasi, Usec. Rocky, iyong facilities namin will allow social distancing, kailangan iyong supply ng tubig nandiyan, iyong supply ng gamot at saka iyong emergency steps which we will undertake, kung sakali mang magkaroon ng problema. Pero ang may final say talaga is really the Department of Health. Kapag sasabihin nila na puwede na ang isang eskuwelahan, ang gawin namin, dahil ang instructions kasi, Usec Rocky ng Presidente ay 100 schools. Susulat kami, naghahanda na kami ngayon ng report sa Presidente na kung puwede ng dagdagan iyong 100 na pinayagan niya ay talagang magdagdag tayo, dahil maganda naman ang balita na lumalabas ngayon.

USEC. IGNACIO: Opo. Balikan ko lang po si Usec. Pascua. Usec, paano naman daw po paiigtingin pa ng DepEd ang iba pang learning modalities kagaya raw po ng DepEd TV?

Paumanhin po, Usec. Pascua, talaga pong hindi maganda ang ating linya ng komunikasyon sa inyo. Kung sino na lang po ang pupuwedeng sumagot. Secretary, paano naman daw po paiigtingin pa ng DepEd itong iba pang learning modalities kagaya daw po ng DepEd TV, Secretary?

DEPED SEC. BRIONES: Usec. Rocky, puwede iyang masagot ni ASec. Alma, kasi siya naman ang nasa curriculum group. Hindi ibig sabihin na gini-give up natin nag ibang modalities, kasi ang blended learning naman talaga ay halo diyan ng face-to-face, ibang pamamaraan, paggamit ng modules and so on, radyo, telebisyon. Hindi naman iiwanan natin na mayroon na tayong face-to-face. At saka wala akong alam na bansa lalo sa South East Asia na iyong kanilang face-to-face ay purely face-to-face. Ang pagkakaalam ko, partly face-to-face, partly online. Marami nga ang bahagi ng pag-aaral nila ay large online. Pero importante kasi ang face-to-face, kaya talagang nilalagyan nila ng face-to-face, makaunti man, malaki man na bahagi sa pag-aaral, pero mayroong face-to-face. So, hindi bibitiwan iyong other modalities. Pero baka may maidagdag si ASec. Alma diyan.

USEC. IGNACIO: ASec. Alma?

DEPED ASEC. TORIO: Yes, maraming salamat, Secretary. Usec. Rocky, gaya po ng sabi ng ating mahal na Kalihim, hindi po natin binibitawan iyong mga iba’t ibang learning modalities po natin, pero kagaya po ng sabi po ninyo at nasabi na rin ng Secretary na mas lalo pa nating pinaiigting iyong paggamit ng DepEd TV. At ano po iyong ginagawa ng DepEd dito? Ang DepEd po, lalung-lalo na po ang ating DepEd TV team ay patuloy na nakikipag-ugnayan sa ating mga local government units at saka lahat ng mga organisasyon para mas lalo pang mapaabot sa ating mga mag-aaral, iyong paggamit ng TV at iba pang social media reforms.

At malugod po namin na ibalita sa inyo na ang ating kagawaran po ay nagkaroon ng partnership sa United States Agency for International Development or iyong alam natin na USAID, at ang layunin po natin ay sanayin ang higit na 500 DepEd TV script writers at teacher broadcasters para sa gender fair at inclusive educational TV programs natin para sa lahat ng ating mga mag-aaral.

So, makikipagtulungan po ang USAID sa pagdaragdag Filipino Sign Language na pagsasanay sa ating mga guro at ang paglalagay ng sub-title sa mahigit na 200 episodes ng ating TV-based instructional program. At ang pagsalin ng 50 episodes para sa mother tongue languages at paggawa ng 16 bagong episode para sa English at Pilipino subject ng ating DepEd TV. Maraming salamat, USec. Rocky.

USEC. IGNACIO: Thank you po. Sec. Briones, kunin ko lamang po ang mensahe ninyo o paalala po sa mga estudyante, magulang at mga paaralan na makikilahok po sa pagbabalik ng in person sa November 15, go ahead Secretary.

DEPED SEC. BRIONES: Maraming salamat USec. Rocky. Sabi ko napakaganda ang balita at last matutupad na natin talaga ang ating requirements para sa DepEd kasi naidagdag na natin ngayon ang face to face learning maski limitado lamang ito as of now. Umaasa tayo na kung lalong gagaling at bubuti ang sitwasyon sa COVID ay mai-apply din natin ito sa lahat ng ating mga paaralan.

Gusto ko lang i-emphasize na iyong nasanayan natin lalo na sa panahon ko na face to face na every day at 8:00 hours a day ang teacher nakaharap sa estudyante, hindi ganoon ngayon ang pag-a-apply ng face to face.

Kasi ang face to face hinahaluan talaga ng blended learning iyan, ang online ginagamit dahil gusto naman natin na hindi maiiwanan iyong ating bansa, ang ating mga learners sa mga pinakabagong paraan kung saan matuto sila para handa sila sa paglabas ng klase nila, sa pagtrabaho nila na alam nila may technology, alam nila may iba’t-ibang bagay kabisado nila ang radyo, kabisado nila ang television.

Lahat ng pamamaraan sa pag-aaral, hindi lamang sa libro, hindi lamang sa lecture ng teacher kung hindi sa lahat ng pamamaraan para talaga magiging in touch tayo sa mundo at handa iyong ating mga kabataan.

Napakagandang balita ito, nagpapasalamat sa Presidente na binigyan niya tayo ng permiso sa pag-implement nito at kung patuloy iyong ating pag-recover sa COVID ay patuloy naman lalawak ang paggamit ng face to face sa ating blended learning approach.

Maraming salamat Rocky, sa pangalan ng ating departamento at sa atin mga parents, local governments napakalaking tulong at lahat na nag-i-interest at talagang gustong ipagpatuloy ang edukasyon ng ating kabataan.

USEC. IGNACIO: Maraming salamat po sa inyong panahon Secretary Leonor Briones, Under Secretary Allain Pascua, Assistant Secretary Alma Ruby Torio at ASEC. Malcolm Garma, mabuhay po kayo at ang Kagawaran ng Edukasyon.

DEPED SEC. BRIONES: Maraming salamat.

USEC. IGNACIO: Mas pinadali na ng Government Service Insurance System ang pagbabayad sa monthly housing loan amortization ng mga member borrowers nito, iyan po ay sa pamamagitan ng GSIS Housing Online Payments or GHOP at para po sa detalye ng programang iyan makakausap po natin ang Vice President ng Real Estate Assets Disposition and Management Office ng GSIS Atty. Apollo Escarez, magandang umaga po Attorney.

Good morning Attorney. Babalikan po natin si Attorney Apollo. Samantala, puntahan muna natin ang mga balitang nakalap ng Philippine Broadcasting Service sa iba’t-ibang lalawigan sa bansa hatid ni John Mogol, mula sa PBS Radyo Pilipinas.

[NEWS REPORT]

USEC. IGNACIO: Maraming salamat sa iyo John Mogol, mula sa PBS Radyo Pilipinas.

Balikan na po natin si Attorney Apollo Escarez, mula po sa GSIS. Attorney. Magandang umaga po!

GSIS VP ESCAREZ: Magandang umaga po, magandang umaga po sa lahat ng mga tagasubaybay.

USEC. IGNACIO: Attorney, paano po ginagamit itong housing online payments at paano daw po puwedeng sumali dito iyong interesadong mag-apply?

GSIS VP ESCAREZ: Salamat po sa tanong ninyo. Iyong GHOP po iyon po ang platform po ng GSIS na maaari pong nagbibigay ng capacity sa ating mga kliyente o miyembro po ng GSIS na may housing loan na magbayad po online sa pamamagitan po ng pag-e-enroll doon sa facility.

USEC. IGNACIO: Opo. Pero Attorney sino-sino po iyong puwedeng gumamit nito at puwede po bang gamitin itong GHOP sa ibang bansa?

GSIS VP ESCAREZ: Ang puwede pong gumamit nito unang-una iyong dapat po may housing loan sa GSIS, dapat dito iyong housing loan niya at updated at hindi po past due o delinquent and then kailangan po mayroon siyang access sa internet. So, puwede niya pong gamitin iyong kaniyang mga gadget, puwede pong cellphone, tablet, laptop or desktop, basta po may access sa internet. So, puwede rin po sa ibang bansa basta po kung mayroon siya ng mga gadget at access sa internet po.

USEC. IGNACIO: Opo. Attorney, paano naman daw po malalaman ang required monthly amortization at magkano po ang loan payment na kailangan bayaran kapag nag-GHOP ang isang loan borrower?

GSIS VP ESCAREZ: Iyon pong mga kliyente ng GSIS housing loan, makikita po nila sa kanilang kontrata, nakalagay po doon sa kanilang mga mortgage contract or loan agreement or sa mga conditional sales contract kung magkano po iyong monthly amortization. Nakalagay rin po doon kung ano po iyong date na kailangan nilang magbayad. So, iyong detalye po na iyon makikita po nila doon sa mga pinirmahan nilang housing loan agreement sa GSIS.

USEC. IGNACIO: Opo. Anong bank account po ang puwedeng gamitin? Puwede daw po ba iyong auto debit para hindi daw po makaligtaan ng mga miyembro iyong kanilang pagbabayad, Attorney?

GSIS VP ESCAREZ: Opo. Sa kasalukuyan po ang partner namin sa ngayon na bangko ay iyong Union Bank. So, kailangan po mayroon kayong account sa Union Bank and then iyong auto debit po mayroon din pong ganoong facility iyong Union Bank na online puntahan lang po iyong bills payment facility at magbigay ng mga information na kailangan doon at nai-program na po iyon ng Union Bank na auto debit para po mas madali sa ating mga kliyente at miyembro.

USEC. IGNACIO: Pero, may transaction fee po ba ito Attorney?

GSIS VP ESCAREZ: Ano po ma’am, medyo nawala po kayo?

USEC. IGNACIO: Kung mayroon po itong transaction fee?

GSIS VP ESCAREZ: Libre po ito ma’am, libre po.

USEC. IGNACIO: Opo. Automatic po ba iyong posting ng payment kapag po nag-GHOP at saan po at kailan po makukuha iyong resibo ng bayad, Attorney?

GSIS VP ESCAREZ: Yes po, Ma’am. Real time po ito, kapag nagbayad automatic po iyong pag-credit ng payment pati po iyong resibo. Kaya lang po iyong resibo makukuha po sa mga cashiering unit ng GSIS Head Office o sa mga branches after 3 days po na nagbayad. Tapos kung magbabayad po kayo ngayon, iyong date po ng payment, kung ano rin po ‘yung date ngayon.

USEC. IGNACIO: So ibig sabihin, Attorney, pareho talaga ng date nang pagbabayad sa G-HOP sa date po na makikita sa resibo, ano po?

GSIS VP ESCAREZ: Opo, iyon din po ang makikita.

USEC. IGNACIO: Opo. Attorney, ano po iyong mangyayari kapag daw po naman nakalimutan magbayad sa monthly due date ng loan amortization?

GSIS VP ESCAREZ: Ito po iyong mahalaga na tandaan ng ating mga miyembro, ang mga kliyente – para lang po makasama sa G-HOP facility, kailangan po updated iyong account. So ibig pong sabihin kung halimbawa ay pumalya sa pagbabayad sa tamang panahon, sa tamang date eh ‘di magiging hindi na po siya updated. Ang puwede pong gawin ng ating mga clients, puwede po siyang mag-update. So, punta muna po siya sa pinakamalapit na branch ng GSIS o kaya po sa head office ng GSIS para po makipag-ugnayan doon, malaman kung magkano iyong kailangang bayaran para ma-update po iyong account. Kapag updated na po, then maaari na po uling pakinabangan o enjoy-in iyong online payment facility.

USEC. IGNACIO: Opo. Pero, paano naman daw po kung sumobra sa monthly amortization iyong binayad ng isang loan borrower?

GSIS VP ESCAREZ: Kapag sobra po iyong payment na iyon, okay naman po. Dapat po eksakto iyong bayad pero kung susobra, iyong mga sobrang payment mapapasok lang po as part payment noong principal. Hindi po siya maku-consider na part payment ng susunod na amortization pero may bawas po doon sa principal amount noong loan. So either sobra po or eksakto ang bayad puwede po, huwag lang po kulang iyong ibabayad.

USEC. IGNACIO: Okay. Natawa ako doon, Attorney. Tama, totoo naman iyon. Paano naman daw po kapag nakapagbayad ng postdated checks?

GSIS VP ESCAREZ: Kung nakapagbayad po ng postdated checks, may dalawa pong option iyong mga miyembro, ang mga clients o borrowers po natin. Una, puwede po nilang ubusin muna iyong postdated check; usually naman po every year kapag postdated check lang iyan. Pero doon po sa mga hindi na puwedeng gumamit ng postdated check o gusto na po talagang tumalon sa G-HOP natin, puwede po silang magbigay ng advise sa GSIS o sa pinakamalapit na branch ng GSIS na i-pullout na lang po iyong natitirang PDC and from that time po puwede na pong through G-HOP na ang bayad niya basta ma-pullout po iyong postdated check.

USEC. IGNACIO: Opo. Eh saan naman daw pupuwedeng humingi ng statement of account ng housing loan?

GSIS VP ESCAREZ: Puwede po. Mayroon po kaming online facility rin, puwede po siyang mag-email sa [email protected]. Puwede rin naman po magpunta siya mismo sa opisina ng GSIS, sa Housing Department po sa building namin sa Pasay or sa pinakamalapit na branches para humingi po ng statement of account.

USEC. IGNACIO: Opo. At saan po puwedeng makipag-ugnayan sakaling may mga tanong po kung nahihirapan silang gamitin itong G-HOP?

GSIS VP ESCAREZ: Aside from iyong physical na pupunta sila doon for conventional na magtatanong po sa opisina, puwede po silang mag-email sa: number one po sa [email protected]; puwede rin po doon sa aming opisina, iyong [email protected]; mayroon din pong iba pang email addresses at contact numbers na pinu-provide po doon sa mismong website po ng GSIS, iyong corporate website po namin. Puwede rin po sa [email protected], puwede rin po doon.

USEC. IGNACIO: Opo. Attorney, maraming salamat po sa inyong panahon at more power po sa mga programa at serbisyo ng GSIS para po sa ating mga kababayan.

Muli po nakausap natin si Attorney Apollo Escarez, ang Vice President ng GSIS. Salamat po.

GSIS VP ESCAREZ: Salamat po Ma’am at sa ating mga kababayan po.

USEC. IGNACIO: Maraming salamat din po sa ating mga partner-agency para sa kanilang suporta sa ating programa at maging ang Kapisanan ng mga Brodkaster ng Pilipinas (KBP).

Maraming salamat din po sa pagsama ninyo sa amin ngayong umaga. Paalala lamang na sundin pa rin natin ang mga ipinatutupad na health protocols at magpabakuna para sa mas masayang Disyembre lalo na 52 days na lang po at Pasko na.

Ako pong muli si Usec. Rocky Ignacio, magkita-kita tayo uli bukas dito lamang sa Public Briefing #LagingHandaPH.

###

—
News and Information Bureau-Data Processing Center